VOV4.Sêdang - Kơxo lơ 7/5, Tíu xiâm séa ngăn mơdât pơreăng kong pơlê Lâm Đồng ăm ‘nâi: lâp tung kong pơlê hiăng ai 8 rơpâu 347 ngế châ pâk vaccine hbrâ mơdât COVID-19 trum má 1 xua AstraZeneca mơjiâng pro. Tơdroăng pâk châ tơniăn, luât tơdroăng pơkâ dêi Khu xiâm ngăn pơkeăng pơlât xĭng xoăng 7 rơpâu 100 klŏng vaccine vâ pâk ăm mâu ngế ki cheăng khăm pơlât, hbrâ mơdât pơreăng.

Tung pơla tơbleăng pâk vaccine sap hâi lơ 23/4 troh hâi lơ 5/5. Kơvâ ngăn pơkeăng Lâm Đồng hiăng tơkŭm 53 tíu vâ pâk a Tíu xiâm séa ngăn mơdât pơreăng kong pơlê, 2 to hngêi pơkeăng kân kong pơlê, Hngêi pơkeăng Hoàn Mỹ Đà Lạt, 12 to hngêi pơkeăng, tiú veăng khăm pơlât kân tung kơpong, hngêi pơkeăng cheăm, Kŏng an kong pơlê.

Klêi séa ngăn ăm ‘nâi, klêi pâk ai 1 rơpâu 64 ngế tung châ oh tá tâ klâi môi tiah hmâ ƀă vaccine ƀă 1 ngế tâ châi ó ki tơ ê, hiăng châ khăm ngăn krâu ƀă hiăng châ tơniăn.

Gương tơplôu ƀă tơbleăng