VOV4.Sedang - Klêi kơ’nâi môi pơla pơtê pơtân hên tơdroăng pêi cheăng vâ hbrâ mơdât COVID 19, Vi ƀan kong pơlê Lâm Đồng tơbleăng mơ-éa ăm phêp mâu tíu tê mơdró vêh pêi cheăng sap ing 2 chôu kơxê hâi lơ 27/5. Pơtối mê, mâu tíu pêi cheăng môi tiah pôe xâk, rơnuâ châ chăn, tíu tê tơmeăm kâ – têa ô kĭng hâng lông troăng ƀă mâu môn tơ’noăng ivá, kâu lăk ƀô̆ pơtâp ivá vêh pêi cheăng sap ing 2 chôu kơxê lơ 27/5.

Tơdrêng amê, mâu tiú tê mơdró ki ê môi tiah quăn ƀar, karaoke, tíu xuâng, tíu xah hêi điê̆n tưh, kơchơ tê mơdró kơmăng, massage, tiú mơ’no um xinê, mâu tơdroăng hơdruê xuâng ƀă mâu tơdroăng xah hêi tơkŭm a mâu plông kân, drô long têa, kơdrum reăng, mâu hneăng tơ’noăng ivá xuân pơkâ thế pơtê pêi cheăng troh drêng ai tơbleăng nếo.

Nôkố Lâm Đồng dế pêi pro klâ kơtăn 209 ngế ing kơpong ai pơreăng, tung mê, ai 10 ngế klâ kơtăn a hngêi pơkeăng, 127 ngế klâ kơtăn tơkŭm ƀă 72 ngế klâ kơtăn a hngêi. Kơxo lơ 27/5, ai tơ’nôm 52 ngế khăm ngăn pơrá ăm hlo âm tĭnh ƀă COVID 19.

A Sa Ly tơplôu ƀă tơbleăng