VOV4.Sêdang - Mâu hâi ki kố, tơdroăng chiâ xo prêi hmâng to lo vâ a kơpong tơkăng pơla cheăm Tà Nung, pơlê kong kơdrâm Đà Lạt ƀă cheăm Mê Linh, tơring Lâm Hà, kong pơlê Lâm Đồng hiăng hlo ai nếo ƀă pro a ngâ hlối. Hên kơpong kong ngo hiăng tro chiâ xo vâ tăng hmốu, tung pơla mê, khu kăn pơkuâ ngăn ôh tá vâ mơdât, hmôu pơ lôi tiah mê. Tơdroăng ki rơhêng vâ tối mê, a mơ’nui hơnăm nah. Vi ƀan hnê ngăn kong pơlê Lâm Đồng hiăng pơkâ pơxâu phak hên khu mơdró kâ ki chiâ xo hmốu ôh tá tá tro luât, la tơdroăng kố tá hâi hlo ai pơtê.

Troh a kơpong Bãi Sậy, ối tung thôn 4, cheăm Tà Nung, pơlê kong kơdrâm Đà Lạt a hâi lơ 10/5, a ngiâ ngin cho mâu ngo ki ối tung tơnêi kong tung kơpong ki hiăng tro vâi chiâ, po kơlâk vâ xo tơnêi ƀă xo hmốu. Mâu tơdroăng cheăng kố cho ôh tá tro luât la vâi tơbleăng bro a ngâ hlối. Mâu kŏng nhân ki pêi cheăng mung akố ăm ‘nâi, tung pơla hdrối kố nah, drêng ‘nâ ai kăn ƀô̆ cheăm mot tung kố, la tơdroăng ki chiâ xo hmốu xuân chiâ xo đi đo tiah hmâ.

Ƀă pôa Phan Quang Trung, a tôh 14, thôn 4, cheăm Tà Nung, ngế ki châ ngăn cho ki xiâm tơkŭm djâ chiâ xo hmốu ôh tá tro luât tung kơpong kố tối, xua ôh tá ai tơdroăng cheăng pêi ƀă ôh tá ai kơbố tối klâi mê pôa khoh chiâ xo hmốu ôh tá tro luât.

“Vâi xuân ôh tá pro tơ’lêi hlâu klâi la á xuân ối pêi ƀă ôh tá ai kơbố tơpui tối klâi ôh, á chiâng vâ tối nhên tiah mê. Khu kăn pơkuâ cheăm vâi lăm troh akố to lâi xôh rup xo rơxế, la klêi kơ’nâi tơleăng mê djâ rơxế vêh. Nôkố cho pơtê pơtân, la tâng pơtê á ôh tá ‘nâi pêi cheăng klâi mê chiâng pêi pro nếo tơdroăng ki kố”.

Tíu ki chiâ xo hmốu ôh tá tro luât a cheăm Tà Nung – Đà Lạt

Klêi kơ’nâi tí tăng ‘nâi, pakĭng tơdroăng ki chiâ xo hmốu ki vâi pong, chiâ, tơdroăng ki pro ngo chiâng tơbăng vâ xo hmốu ƀă hrik xo prêi ôh tá tro luât a kơpong kố xuân hlo hên hĭn. Tiô pôa Liêng Hót Quil, kăn ƀô̆ ngăn ‘na tơnêi châk – pêi chiâk deăng – mơjiâng pro kế tơmeăm – kong prâi tơnêi tíu cheăm Tà Nung, khu ngế ki hneăng hmốu, hrik prêi, môi tiah vâi ‘nâi hdrối mâu tơdroăng ki khu râ kơpêng lăm séa ngăn, mê đi đo hmuâ hdrối tâ vâi troh:

“Xơpá cho drêng ngin lăm chu ngăn mê vâi pơrá hiăng ‘nâi hdrối, môi tiah vâi đi đo pêi cheăng akố. Drêng á lăm chu ngăn mê vâi ‘nâi, vâi pơtê tâi tâng hlối mâu tơdroăng cheăng ki vâi dế pêi”.

Tiô pôa Kră Jăn Ha Djiệp, kăn phŏ hnê ngăn Vi ƀan cheăm Tà Nung, Pơlê kong kơdrâm Đà Lạt, hdrối mê, cheăm hiăng hên hdroh chêh pro hlá mơ-éa pơxâu phâk ‘na liăn ƀă mâu ngế ki pro xôi ‘na tơdroăng ki chiâ xo kế tơmeăm khoăng ôh tá tro luât a kơpong Bãi Sậy kố, la pơxâu klêi, mâu khu ki ai tơdjâk troh vâi ối chiâ xo tiah hmâ ôh tá tro luât. Kố cho tơdroăng ki pá puât hêng hôu pro khu kăn pơkuâ châi ko.

“Xơpá dêi cheăm cho tơdroăng ki pơkâ tơleăng. Pơxâu phak klêi môi, péa măng tĭng kơ’nâi ah mê vâi lăm chiâ xo nếo. Tối tơdrăng, ngin pêi tơdroăng khât, ƀă pakĭng mê ngin ôh ti ‘nâi. Kố cho mâu hồ sơ, ngin hiăng pơxâu phak to lâi hdroh”.

Chiâ xo hmốu ôh tá tro luât mơni kô pro tơhnâp tơnêi a Lâm Đồng

Tiô hồ sơ ki Vi ƀan hnê ngăn cheăm Tà Nung tơbleăng ăm, pơkâ tơleăng mâu ngế ki pro xôi ‘na liăn ngân kơvâ chiâ xo hmốu ƀă ‘na tơnêi achê kố a kơpong Bãi Sậy cho a hâi lơ 5/1/2021. Tiah mê, lối 5 khế pơtối mê, tơdroăng ki séa ngăn, pơkâ tơleăng tơdroăng ki chiâ xo hmốu a kơpong kố hiăng hlo vâi pêi pro ôh tá kơtăng; tơdroăng ki chiâ xo hmốu ôh tá tro luât a tíu kố rế hía rế tơbleăng ƀă rế hlo hên hĭn.

A kơpong ki tơdjêp kĭng pơla cheăm Tà Nung, Pơlê kong kơdrâm Đà Lạt ƀă cheăm Mê Linh, tơring Lâm Hà nôkố dế ối ai iâ hlái 4 tíu dế chiâ xo hmốu pro ƀă tiô ki kân. Tung mê, ai tá tíu ki chiâ xo, tơdjâk xuân ối tung tơnêi pêt kong. Tiô kuăn pơlê a cheăm kố, tơdroăng ki chiâ xo hmốu ôh tá tro luât akố hiăng hlo sap ing hên hơnăm hdrối nah, pro tơ’nhiê kong ngo ƀă mơni kô tơhnâp tơnêi drêng kong mê kân.

Tơdroăng ki chơ hmốu lo ing kơpong ki chiâ xo kố xuân dế cho tơdroăng ki ôh tá tơniăn ‘na troăng prôk, pro tơ’nhiê troăng prôk xua kuăn pơlê ‘no dêi liăn pro.

Hdrối mê, Vi ƀan hnê ngăn kong pơlê Lâm Đồng hiăng ai hên hlá mơ-éa pơkâ thế mâu kơ koan ki ai tơdjâk troh mơdêk hnoăng cheăng rak ngăn, séa ngăn tơdroăng cheăng pêi pro chiâ xo kế tơmeăm, khŏm pơkâ tơleăng kơtăng mâu khu tơrŭm, mâu ngế krê ki pro xôi luât, chiâ xo kế tơmeăm ôh tá tro luât.

Hâi lơ 17/2 hơnăm nah, Vi ƀan hnê ngăn kong pơlê Lâm Đồng xuân hiăng mơ’no tơdroăng ki pơxâu phak ‘na liăn ƀă 5 khu mơdró kâ dế pêi cheăng tung kơvâ cheăng chiâ xo kế tơmeăm ƀă hên hĭn tơdroăng ki xôi, mê cho: Kŏng ti pêi cheăng tiô rơnó Hưng Nguyên, Kŏng ti pêi cheăng tiô rơnó Hà Thanh, Kŏng ti pêi cheăng tiô rơnó mơjiâng pro tê mơdró Hà Hưng, Kŏng ti Tơlo liăn ‘no liăn mâu khu mơdró kâ a kơpêng tro Vi ƀan hnê ngăn kong pơlê Lâm Đồng pơxâu phak ƀă nâp ƀă kơxô̆ liăn ôh tá tro luât ki vâi pêi lo ing tơdroăng ki chiâ xo kế tơmeăm ôh tá tro luât lối 5 rơtal 300 rơtuh liăn.

Tiah mê, tơdroăng ki chiâ xo tơmeăm khoăng ôh tá tro luât nôkố xuân ối hlo ôh tá tơniăn a kơpong tơdjêp kĭng pơla cheăm Tà Nung, pơlê kong kơdrâm Đà Lạt ƀă cheăm Mê Linh, tơring Lâm Hà.

Quang Sáng chêh

Katarina Nga tơplôu ƀă tơbleăng