VOV4.Sêdang - Khu pơkuâ hdroâng kuăn ngo kong pơlê Lâm Đồng tối ăm ‘nâi, klêi kơ’nâi môi pơla rah, ing tơdroăng loi tơngah dêi vâi krâ hdroâng kuăn ngo a mâu thôn, pơlê… Troh nôkố hiăng môi tuăn chêh inâi 479 ngế ki kuăn pơlê loi tơngah. Inâi kố xuân hiăng châ Vi ƀan kong pơlê môi tuăn kĭ môi tuăn. Mâu ngế ối tung inâi kố pơrá ối tung mâu ngế ki kuăn pơlê loi tơngah, rơkê, ai veăng kum ƀă tơdjâk kân tung hdroâng hdrê, pơlê, mâu ngế ki ‘nâ ai tơdjâk a mâu râ cheăm, tơring, pơlê kong kơdrâm ƀă hía hé.

Vâi xuân cho khu ki djâ troăng hdrối tung mơnhông cheăng kâ, mơhnhôk nhŏng o hdroâng hdrê ƀă pơlê pơla pêi pro tơtro mâu pơkâ tơkêa; luât pơlê, tah lôi mâu khôi túa ôh tá lĕm tro, pêi pro tơdroăng rêh ối nếo. Mâu ngế ki kơhnâ rơkê, kuăn pơlê loi tơngah tung lâp kong pơlê xuân hiăng pêi pro tơtro tơdroăng mơhnhôk vâi krâ hdroâng kuăn ngo mơ-eăm cheăng kâ; pêi pro kơtăng mâu troăng hơlâ, tơdroăng pơkâ dêi Đảng, troăng hơlâ, luât dêi tơnêi têa, kum pêi pro ƀlêi trâng mâu pơkâ mơnhông cheăng kâ – rêh ối pơlê pơla, rak tơniăn gak kring cheăng kal kí, tơniăn lâp pơlê pơla dêi kong pơlê.

A Sa Ly tơplôu ƀă tơbleăng