VOV4.Sêdang - Kong pơlê Lâm Đồng tơkŭm po rôh hôp ‘no tơdrêng tung um tơvi mơgêi hnoăng cheăng hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ hơnăm 2020 ƀă tơbleăng hnoăng cheăng ki kal tung hơnăm 2021. Tung hơnăm 2020, maluâ iâ kong mêi khía mơhot têa kân lân lu la lâp kong pơlê tro lŭp lối 100 rơtal liăn. Tơdroăng ki kong tô mơdrăng khăng khoăng xuân hiăng pro ôh tá ai têa ƀă dâng 1.300 ha hdrê loăng pêt a mâu tơring, cheăm tung kong pơlê ôh tá ai têa tôh.

Hơnăm 2020, kong pơlê Lâm Đồng hiăng mơhnhôk mâu kơxô̆ liăn tơlo sap ing hngêi rak liăn, Khu râng liăn hbrâ ví khía mơhot têa kân lân lu. Ki nhên: ‘No lối 72 rơtal liăn vâ ‘mâi rơnêu mâu kế tơmeăm ki tro tơ’nhiê xua kong mêi khía mơhot têa kân lân lu pro; ‘no lối 6 rơtal liăn vâ kum mâu tơring, cheăm ‘mâi mơnhông mâu kế tơmeăm ki tro tơ’nhiê xua kong mêi khía mơhot pro.

A rôh hôp, mâu khu râ, kơvâ cheăng ƀă mâu tơring, cheăm hiăng tơkŭm tối mâu tơdroăng ki tá hâi pơkâ tơleăng klêi, xuân môi tiah pơkâ mơ’no mâu troăng hơlâ vâ tối tơbleăng tro hnoăng cheăng hbrâ mơdât kong mê khía mơhot têa kân lân lu ƀă tí tăng tŏng xo mâu ngế hliăng tiâ.

Katarina Nga tơplôu ƀă tơbleăng