VOV4.Sêdang - Kơxo lơ 23/3, a Tíu pêi cheăng xiâm dêi kong pơlê, khu hnê mơhno cheăng dêi Vi ƀan Măt trâ̆n tơnêi têa Việt Nam kong pơlê Lâm Đồng tơkŭm po hneăng hôp mơ’no tơdrêng tung lâp kong pơlê vâ hnê xo tơdroăng kuăn pơlê veăng hnê tối a tíu ối dêi mâu ngế ki lo tơbriât pro kăn Kuô̆k Hô̆i hneăng má 15, mâu kăn Hô̆i đong rêm râ hneăng hơnăm 2021-2026. Hneăng hôp châ po mơ’no tơdrêng tung um tơvi troh 12 tíu mơ’no a mâu tơring, pơlê kong krâm, kong kơdrâm tung kong pơlê.

Mâu kăn veăng hriâm tâp a tíu hôp mơ’no tơdrêng tung um tơvi a Đà Lạt

Ing hneăng hôp tơmâng xo tơdroăng veăng hnê tối dêi kuăn pơlê a tíu ối dêi mâu ngế lo tơbriât, Khu  hnê mơhno cheăng Vi ƀan Măt trâ̆n tơnêi têa rêm râ ai tiú ki vâ tối tŭm tâi tâng, tối ki tro tơdrăng dêi mâu ngế  ki lo tơbriât hôp tơpui chêh inâi rah xo mâu ngế ai tŭm ivá tro tiô pơkâ, tơxâng ƀă kuăn pơlê rah xo a hneăng hôp tơpui tơno rôh má pái.

Hneăng hôp tơmâng xo tơdroăng veăng hnê tối bú tơniăn nhên krá khât, pro tơ’lêi hlâu vâ kuăn pơlê ki rah xo pơtối pêi tro tuăn kuăn pơlê, pơtối rak vế ki tơdroăng tơná ‘nâi veăng tối ƀă mâu ngế ki lo tơbriât. Hâi khế tơkŭm po hneăng hôp trâm mâ kuăn pơlê ƀă mâu ngế ki lo tơbriât pro kăn châ pêi pro sap lơ 21/3 troh 13/4.

Gương tơplôu ƀă tơbleăng