VOV4.Sêdang - Pôa Trần Đức Quận, Kăn pơkuâ hnê ngăn cheăng Đảng kong pơlê Lâm Đồng hiăng pơkuâ hneăng hôp Khu pơkuâ cheăng Đảng kong pơlê roh má 6 hneăng má XI tơpui ‘na tơdroăng pêi pro rah xo mâu kăn teăng mâ Kuô̆k hô̆i hneăng má 15 ƀă kăn teăng mâ Hô̆i đong kuăn pơlê kong pơlê hneăng hơnăm 2021 – 2026 ƀă mâu tơdroăng kal ki ê.

Lâm Đồng: Hneăng hôp Khu pơkuâ cheăng Đảng kong pơlê roh má 6 

A hneăng hôp kố, Khu pơkuâ cheăng Đảng kong pơlê veăng tơpui tơdjâk troh mâu tơdroăng xiâm: tơdroăng rah xo mâu kăn teăng mâ Kuô̆k hô̆i hneăng má 15 ƀă kăn teăng mâ Hô̆i đong kuăn pơlê kong pơlê hneăng hơnăm 2021 – 2026 tiô pơkâ 09 dêi Vi ƀan pơkuâ Kuô̆k hô̆i – Chin phuh – Vi ƀan xiâm Măt trâ̆n Tơnêi têa Việt Nam; Troăng mơ’no liăn mơjiâng tơdroăng tơkêa bro troăng kân ăm phêp rơxế kơtâu têi Tân Phú – Bảo Lộc; Tơdroăng pơcháu pơkâ kơxô̆ liăn ngân Tơnêi têa hơnăm 2021 ăm mâu kế tơmeăm khoăng, tơdroăng tơkêa bro tung kong pơlê; Tơdroăng tơkêa bro pêt loăng plâi mắc ca a tơring Dam Rông ƀă tơdroăng xing xoăng, pơtê lôi râ cheăng tiô pơkâ dêi Tơnêi têa.

A Sa Ly tơplôu ƀă tơbleăng