VOV4.Sêdang - Măng tĭng hdrối, Vi ƀan hnê ngăn kong pơlê Lâm Đồng hiăng ai rôh pêi cheăng ƀă Vi ƀan mơngế Việt Nam a kong têa ê a Pơlê kong kân Hồ Chí Minh rơtế ƀă mâu khu mơdró kâ cho kuăn pơlê Việt Nam ki rêh ối a kong têa ê, vâ tối tơbleăng mâu tơdroăng kal, tơdjêp pơla mâu khu ki ‘no liăn cheăng, khu mơdró kâ, mâu ngế Việt Nam a kong têa ê, vâ krếo thế tối tơbleăng mâu tơdroăng tơkêa a kong pơlê.

Kong pơlê Lâm Đồng hiăng tơbleăng troh khu ki pêi dêi hnoăng cheăng dêi Vi ƀan mâu ngế Việt Nam a kong têa ê a Pơlê kong kân Hồ Chí Minh ƀă mâu khu ki ‘no liăn cheăng, khu mơdró kâ, khu mơdró kâ cho mâu ngế Việt Nam a kong têa ê ‘na ki ai hlâu, ivá rơdêi dêi kong pơlê Lâm Đồng; tối tơbleăng tơdroăng kal dêi mâu tơdroăng tơkêa dế krếo thế tơ’mot ‘no liăn cheăng môi tiah: Tơdroăng tơkêa kơpong ôm hyô long Prenn, tơdroăng tơkêa Kơphô̆ Liên Khương – Prenn, Kơpong ôm hyô Tơnêi têa long Tuyền Lâm ƀă hên ki ê.

Tiô pôa Nguyễn Văn Châu, kăn phŏ pơkuâ Khu ngăn chiâk deăng ƀă mơnhông thôn pơlê kong pơlê Lâm Đồng, pakĭng ki rơdêi ‘na ôm hyô tơ’mot rêm hơnăm dâng 7 rơtuh ngế tơmối, Lâm Đồng ối cho kong pơlê ki djâ troăng ahdrối tung tơdroăng ki pêi chiâk deăng xúa kơmăi kơmok chal nếo. Xua mê, kong pơlê dế tơkŭm mơđah tơbleăng, krếo thế ƀă tơ’mot tơ’nôm hên khu ki ‘no liăn cheăng tung tơnêi têa ƀă kong têa ki ê.

“Chiâng vâ tối tơdroăng ki pêi chiâk deăng Lâm Đồng mơnhông ôh tá păng lôi mâu khu mơdró kâ, malối cho mâu khu mơdró kâ kong têa ê vâ tơdroăng ki pêi chiâk deăng kong pơlê pêi pro troh mâu kong têa ki tê mơdró kế tơmeăm ngi kong têa ê, mơdêk ki kơnía tung lâp lâp plâi tơnêi. Malối cho kế tơmeăm hdrê loăng pêt ki ai ivá rơdêi môi tiah chế, kơphế, hdrong xo prế, kơchâi, reăng ƀă păn ro xo têa tôu ƀă hên ki ê. Tâng mâu khu mơdró kâ tăng ‘nâi trâu hngế tâ ƀă ‘no liăn cheăng mê kô kum ăm Lâm Đồng mơnhông tơtêk”.

Klêi rôh pêi cheăng ƀă kong pơlê, khu kăn ki pêi dêi hnoăng cheăng dêi Vi ƀan mâu ngế Việt Nam a kong têa ê a Pơlê kong kân Hồ Chí Minh ƀă mâu khu mơdró kâ, khu ki ‘no liăn cheăng xuân hiăng pêi cheăng ƀă kăn pơkuâ tơring Lạc Dương, tí tăng ngăn Grup pơkuâ Liên Minh, Kŏng ti kế tơmeăm pêi lo ing chiâk deăng Langbiang ƀă séa ngăn a mâu tơdroăng tơkêa dế châ kong pơlê Lâm Đồng krếo thế ‘no liăn cheăng.

Pôa Steve Bùi, kăn xiâm pơkuâ grup pơkuâ Delta E & C Japan ăm ‘nâi, nôkố, mâu khu ki ‘no liăn cheăng, khu mơdró kâ, khu mơdró kâ cho mâu ngế Việt Nam a kong têa ê rế hía rế ai tơdroăng ki rơhêng vâ vêh dêi ngi pơlê ‘no liăn cheăng. Xua mê, rôh lăm tí tăng ‘nâi ki ai khât kố kô cho kông tơdjêp, tơdroăng ki kal po ăm hên rôh ki tơ’lêi hlâu ăm mâu khu mơdró kâ, khu mơdró kâ cho mâu ngế Việt Nam a kong têa ê veăng ‘no liăn cheăng a kong pơlê. Pôa Steve Bùi tối mơnhên:

“Ngin xuân hlo, kong pơlê Lâm Đồng cho môi tíu ki tơ’mot ‘no liăn cheăng rơdêi khât, mâu troăng hơlâ pơkâ tơdrăng ƀă nhên, pro tơ’lêi hlâu khât ăm mâu khu mơdró kâ tung tơnêi têa ƀă a kong têa ê troh ƀă kong pơlê. Loi tơngah tiah kố, ing rôh lăm pôu kố ngin kô ai tơdroăng ki tơrŭm krá tung tơdroăng ki tối tơbleăng tơdroăng kal, ƀă mơni kô rah xo Lạc Dương cho tíu ki ‘no liăn cheăng ki apoăng a kong pơlê Lâm Đồng kố”.

Quang Sáng chêh

Katarina Nga tơplôu ƀă tơbleăng