VOV4.Sêdang - Vi ƀan kong pơlê Lâm Đồng hiăng ai roh pêi cheăng ƀă Vi ƀan mơngế Việt Nam a kong têa ê ai Tíu cheăng teăng mâ a Pơlê kong kân Hồ Chí Minh rơtế ƀă mâu ngế tê mơdró cho mơngế Việt Nam rêh ối pêi cheăng a kong têa ê, mơngế kong têa ê, vâ tối mâu tơdroăng, tơrŭm pơla mâu khu mơ’no liăn cheăng, khu tê mơdró, mơngế Việt Nam a kong têa ê, vâ krếo tế po rơdâ pêi pro mâu tơdroăng tơkêa bro a kong pơlê.

Lâm Đồng kơbong krếo mơngế tê mơdró Việt Nam a kong têa ê mơ'no liăn cheăng a kong pơlê Lâm Đồng.

Kong pơlê Lâm Đồng hiăng tơbleăng troh tơdroăng pêi cheăng dêi Vi ƀan mơngế Việt Nam a kong têa ê a Pơlê kong kân Hồ Chí Minh ƀă mâu khu mơ’no liăn cheăng, ngế tê mơdró, ngế mơdró kâ mơngế Việt Nam a kong têa ê ‘na tơmeăm khoăng ki ai hlâu, mơnhông mơdêk dêi kong pơlê Lâm Đồng; tơbleăng tơdroăng tơkêa bro dế kơbông krếo mơhnhôk mơ’no liăn cheăng, môi tiah:  Tơdroăng tơkêa bro ôm hyô long têa Prenn, Tơdroăng tơkêa bro tíu kơdrâm kuăn pơlê rêh ối cheăng kâ Liên Khương – Prenn, kơpong ôm hyô lâp tơnêi têa long têa Tuyền Lâm.

Pôa Steve Bùi, Kăn pơkuâ Grup pơkuâ Delta E ƀă C Japan tối ăm ‘nâi roh lăm ti tăng plĕng tơdroăng kố kô cho kông tơdjêp, xiâm kối ki kal vâ po hên roh tơ’lêi hlâu ăm mâu khu tê mơdró, ngế tê mơdró mơngế Việt Nam a kong têa ê veăng mơ’no liăn cheăng a kong pơlê Lâm Đồng.

            A Sa Ly tơplôu ƀă tơbleăng