VOV4.Sêdang - Pêi pro tiô Rơkong krếo thế dêi kăn xiâm pơkuâ ngăn Đảng, kăn xiâm hnê ngăn tơnêi têa ‘na tơdroăng Tâi tâng kuăn pơlê tơrŭm, tŏng kum ivá hbrâ mơdât pơreăng COVID-19, rơtế prôk, tŏng kum mâu kong pơlê, pơlê kong kân tung hnoăng cheăng hbrâ mơdât pơreăng, sap ing khế 7 nah troh nôkố, kong pơlê Lâm Đồng hiăng mơhnhôk rêm ngế veăng kum roê, tŏng kum châ vâ chê 29 rơpâu tâ̆n kế tơmeăm pêi lo ing chiâk deăng ki hên cho kơchâi, plâi dêi kuăn pơlê a mâu kơpong ki ai pơreăng.

Lâm Đồng veăng gum 29.000 tâ̆n kế tơmeăm ăm mâu kong pơlê ki ê tung hbrâ mơdât pơreăng COVID-19

Tung mê, hên má môi cho tŏng kum kuăn pơlê a Pơlê kong kân Hồ Chí Minh ƀă kế tơmeăm kum troh lối 16.800 tâ̆n, pơlê kong kân Đà Nẵng vâ chê 2.300 tâ̆n, mâu kong pơlê ki ê môi tiah: Đồng Nai, Bình Dương, Khánh Hòa, Bình Thuận, Bà Rịa – Vũng Tàu, Phú Yên, Long An, Tiền Giang ƀă hên kong pơlê ki ê lối 9.600 tâ̆n kế tơmeăm pêi lo ing chiâk deăng.

Tiô khu ngăn chiâk deăng ƀă mơnhông thôn pơlê kong pơlê Lâm Đồng, tâi tâng mâu kế tơmeăm pêi lo ing chiâk deăng kố ai tâi tâng kơxô̆ liăn troh vâ chê 188 rơtal, châ mơhnhôk sap ing hên khu veăng kum.

Katarina Nga tơplôu ƀă tơbleăng