VOV4.Sedang - Riân troh 9 chôu kơxo lơ 23/5, kong pơlê Lâm Đồng hiăng ai lối 281 rơpâu ngế kuăn pơlê lăm tâ phĭu, châ vâ chê 30% tâi tâng kơxô̆ kuăn pơlê tung kong pơlê. Klêi kơ’nâi leh koh hlá cơ pơxiâm po rôh tâ phĭu, tâi tâng 1.110 kơpong tâ phĭu dêi kong pơlê Lâm Đồng hiăng tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 -2026. Klêi kơ’nâi 2 chôu, hiăng ai lối 281 rơpâu ngế kuăn pơlê tâ phĭu, châ vâ chê 30% tung tâi tâng kơxô̆ kuăn tung lâp kong pơlê.

A mâu kơpong tâ phĭu, tơdroăng ki tâ phĭu hlo tơ’niăn, krâu khât, mâu kuăn pơlê pơrá pêi pro tro tơdroăng pơkâ 5K vâ rak tơniăn hnoăng cheăng hbrâ mơdât pơreăng COVID-19.

Kuăn pơlê mơngế K’ho a chêng ngo Langbiang, pơlê kân Lạc Dương (Lâm Đồng)

A kơpong tâ phĭu kơxô̆ 5, pơlê kân Lạc Dương, tơring Lạc Dương (Lâm Đồng), kuăn pơlê hdroâng kuăn ngo K’ho a tíu kố xuân hiăng tâ phĭu klêi kơ’nâi po leh koh hlá cơ. Liêng Hót Ha Tuyên, 60 hơnăm, a ƀuôn Đăng Gia Dềt B, pơlê kân Lạc Dương hiăng pêi klêi hnoăng cheăng kuăn pơlê dêi tơná, hơniâp ro tối:

“Ngăn inâi ƀă pin athế hriăn ngăn nhên ‘na inâi vâ mơnhên pin kô pôk ngế ki lâi. Loi tơngah ngế ki lâi mê pin nếo pôk ngế ki mê. Rơhêng vâ pôk ngế ki rơkê plĕng vâ kum ăm kuăn pơlê, athế môi hiâm mơno ƀă Đảng, xua Tơnêi têa, xua kuăn pơlê! Á rơhêng vâ tiah mê”.

A Sa Ly tơplôu ƀă tơbleăng