VOV4.Sêdang - Hâi lơ 5/4, Khu ngăn pơkeăng ƀă khăm pơlât Lâm Đồng pơkâ thế Tíu xiâm séa ngăn pơreăng châi tamo kong pơlê, tíu xiâm ngăn pơkeăng pơlât mâu tơring, pơlê kong kơdrâm ƀă mâu tíu khăm pơlât tung lâp kong pơlê mơdêk tơdroăng ki hbrâ mơdât pơreăng thĕn kŏng chêng rơkong. Tiô Tíu xiâm Séa ngăn châi tamo Lâm Đồng, sap ing apoăng hơnăm 2021 troh nôkố, lâp kong pơlê ai tâi tâng kơxô̆ ngế tâ pơreăng thĕn kŏng chêng rơkong ai 149 ngế tâk 109 ngế tâng vâ pơchông ƀă khế kố hơnăm nah.

Pêi pro tơdroăng ki hnê mơhno dêi khu rak ngăn khăm, pơlât, ối tung khu xiâm ngăn pơkeăng ƀă khăm pơlât ‘na tơdroăng ki mơdêk hnoăng cheăng pơlât pơreăng tơê̆n kŏng chêng rơkong, vâ rĕng châ hbrâ mơdât pơreăng thĕn kŏng chêng rơkong, pôi tá ăm pơreăng tâ tú tung lâp lu, Khu ngăn pơkeăng ƀă khăm pơlât kong pơlê pơkâ thế Tíu xiâm Séa ngăn pơreăng châi tamo kong pơlê chêh inâi túa ki hbrâ mơdât, pơreăng thĕn kŏng chêng rơkong a kong pơlê ƀă rĕng tơbleăng pêi pro túa pơkâ mơ’no.

Katarina Nga tơplôu ƀă tơbleăng