VOV4.Sêdang - Troh nôkố, kơxô̆ liăn ki châ ‘no pêi cheăng tơdjuôm dêi Lâm Đồng pêi pro lối 1.167 rơtal liăn, châ vâ chê 22% túa pơkâ. Tâng vâ pơchông ƀă khế kố hơnăm nah kơdroh 0,3%. Xiâm kối ‘no liăn hrá cho xua tơvâ ‘na hlá mơ-éa ‘no liăn cheăng, tơnêi tơníu ƀă mâu tơdroăng ki ê mê chiâng hrá dêi khu ki ‘no liăn cheăng, tíu pêi cheăng tơdjuôm.

Vâ veăng kum mơdêk cheăng kâ, Vi ƀan hnê ngăn kong pơlê pơkâ thế mâu khu râ, kơvâ cheăng, kong pơlê pơtối mơdêk mâu troăng hơlâ pêi pro ‘no liăn cheăng tơdjuôm sap ing kơxô̆ liăn hơnăm 2021. Tơdrêng amê hnối khŏm mơ-eăm pơtroh kơxô̆ liăn troh a mâu tíu ki vâ pro la ôh tá châ tiô pơkâ kơxô̆ liăn ‘no troh hâi lơ 30/6/2021 lối tơdế tâng vâ pơchông ƀă kơxô̆ liăn ‘no ăm mâu tơdroăng tơkêa ki pơtối lơ ôh tá pêi klêi lối 30% tâng vâ pơchông ƀă kơxô̆ liăn ‘no ăm tơdroăng tơkêa pơxiâm pro nếo, hơ’leh ăm mâu tơdroăng tơkêa ki ai kơxô̆ liăn ‘no hên.

Troh hâi lơ 30/9/2020, ôh tá xing xoăng túa pơkâ kơxô̆ liăn hơnăm kơ’nâi ăm mâu tơdroăng tơkêa ki ai tơdroăng pêi pro ôh tá châ tiô pơkâ lối 30% tâng vâ pơchông ƀă kơxô̆ liăn ‘no. Châ ‘nâi, hơnăm 2021 Lâm Đồng châ pcơháu tâi tâng kơxô̆ liăn ‘no cheăng lối 5.245 rơtal liăn.

Katarina Nga tơplôu ƀă tơbleăng