VOV4.Sêdang - Hơnăm 2021 mơhno kơxô̆ tê mơdró điê̆n tưh dêi Lâm Đồng ối má 20/56 kong pơlê, pơlê kong kơdrâm djâ Lâm Đồng ối tung khu mơnhông mơdêk tê mơdró điê̆n tưh krâ kơvâ, ối má môi 5 kong pơlê Tây Nguyên ‘na mơhno kơxô̆ mơnhông mơdêk tê mơdró điê̆n tưh. Troh nôkố lâp kong pơlê ai 12 website tơbleăng tơdroăng tê mơdró điê̆n tưh hiăng châ Khu xiâm pơkuâ kơmăi kơmok tê mơdró mơnhên kĭ ƀă 160 website tê tơmeăm dêi khu tê mơdró hiăng châ Khu xiâm pơkuâ Kơmăi kơmok tê mơdró mơnhên hiăng tơbleăng.

Tung la ngiâ, kong pơlê Lâm Đồng pơtối mơhnhôk mâu khu tê mơdró po rơdâ mâu troăng tê, ki má lối troăng tê mơdró điê̆n tưh, tơdrêng amê kong pơlê xuân ai mâu troăng hơlâ tŏng kum, pro tơ’lêi hlâu ăm mâu khu tê mơdró pơtối châ ƀă troăng tê ing tê mơdró điê̆n tưh, kum châ tê hên tơmeăm khoăng.

A Sa Ly tơplôu ƀă tơbleăng