VOV4.Sêdang - Kơxo lơ 16/6, Vi ƀan hnê ngăn kong pơlê Lâm Đồng hiăng ai hlá mơ-éa nếo pơtroh ăm Khu ngăn liăn ngân, Khu ngăn hnê hriâm ƀă Hnê mơjiâng tuăn ngoâ rơkê, Vi ƀan hnê ngăn mâu tơring, pơlê kong kơdrâm môi tuăn pơtối pêi pro tŏng kum tơ’nôm liăn hiăng hên hơnăm ăm mâu thái cô ki hiăng tâi kơlo to liăn khế tá troh drêng ai pơkâ ƀă hnê mơhno nếo dêi Tơnêi têa.

Hlá mơ-éa mê chêh nhên, Luât Hnê hriâm kơxô̆ 43/2014/QH14 hâi 14/6/2019 châ xêt khât pêi pro sap ing hâi lơ 1/7/2020 pơkâ ‘na liăn khế: “Mâu thái cô ki châ pơkâ liăn khế tơtro ƀă tơdroăng cheăng pêi ƀă pêi hnoăng cheăng; châ kơjo kum liăn khế cheăng tiô pơkâ dêi Chin phuh”. Laga, troh nôkố, Tơnêi têa tá hâi ai hlá mơ-éa pơkâ ƀă hnê mơhno ‘na tơdroăng ki hrê liăn khế ki nếo. Xua mê, tung pơla tơkôm Chin phuh ƀă mâu khu xiâm, kơvâ cheăng Tơnêi têa pơkâ hlá mơ-éa hnê mơhno tơdroăng ki ‘no hrê liăn khế ki nếo vâ kum mâu thái cô tơniăn tung rêh ối, hmiân tuăn pêi cheăng, Vi ƀan hnê ngăn kong pơlê môi tuăn pơtối pêi pro tŏng kum liăn ki hiăng hnê ton hơnăm ăm mâu thái cô tá troh drêng ai pơkâ ƀă hnê mơhno ki nếo dêi Tơnêi têa.

Katarina Nga tơplôu ƀă tơbleăng