VOV4.Sedang - Vâ rak tơniăn tơdroăng hbrâ mơdât COVID 19 tung hâi tâ phĭu, Khu pơkuâ ngăn pơkeăng ƀă khăm pơlât kong pơlê Lâm Đồng hiăng ai hlá mơ-éa hnê mơhno mâu Hngêi pơkeăng, mâu tíu khăm pơlât pơreăng tung kong pơlê pơtroh mâu ƀok thái pơkeăng hbrâ mơdât tâng ai ngế tro tâ pơreăng.

Kăn ƀô̆ ƀok thái khăm pơlât dế hbrâ ki pâng rơkong môh, têa xếo kŏng kơdê pơreăng a kơpong tâ phĭu

Khu pơkuâ ngăn pơkeăng ƀă khăm pơlât kong pơlê Lâm Đồng hiăng pơkâ thế mâu hngêi pơkeăng râ kong pơlê; tíu xiâm khăm pơlât mâu tơring, pơlê kong kơdrâm ƀă Hngêi pơkeăng kân Hoàn Mỹ Đà Lạt, rêm tíu mơjiâng môi tôh khăm pơlât mê cho mâu ƀok thái pơkeăng, thái pơkeăng ƀă ngế vê rơxế, ai tŭm pơkeăng, rơxế pơto pơlât vâ hbrâ kum teăm tơdrêng ăm mâu tơring, pơlê kong kơdrâm ƀă cheăm, bêng, pơlê kân.

Tơdrêng amê, tơbleăng troăng phôn tơdah rơkong krếo kum dêi mâu tíu cheăng ăm mâu cheăm, bêng, pơlê kân ƀă mâu Khu tâ phĭu tung kong pơlê vâ teăm tơdah tơdroăng drêng kal khât. Pakĭng mê, mâu khu pơkuâ ngăn pơkeăng ƀă khăm pơlât tung kong pơlê thế pơtroh mâu khu ki pêi cheăng rĕng, hbrâ pêi pro mâu troăng hbrâ mơdât COVID 19 tâng ai ngế tro tâ. Kơvâ xuân hiăng mơhnhôk lối 1.100 ngế kăn ƀô̆ gak ngăn a mâu tíu tâ phĭu vâ hbrâ ăm tơdroăng hbrâ mơdât pơreăng.

A Sa Ly tơplôu ƀă tơbleăng