VOV4.Sêdang - Hâi lơ 8/6, Vi ƀan hnê ngăn kong pơlê Lâm Đồng hiăng tơbleăng hlá mơ-éa ki xiâm ‘na tơdroăng ki ăm phêp vêh pơto chơ tơmối nếo a athế pêi pro kơtăng mâu tơdroăng pơkâ hbrâ mơdât pơreăng Covid-19.Vâ rak tơniăn pêi pro châ tơƀrê “tơdroăng pơkâ pêi pro péa tơdroăng” rế xúa mâu tơdroăng pơkâ hbrâ mơdât pơreăng Covid-19 rế mơnhông mơdêk cheăng kâ rêh ối, Vi ƀan hnê ngăn kong pơlê Lâm Đồng pơkâ thế mâu khu râ, kơvâ cheăng, khu pú hên ƀă Vi ƀan hnê ngăn mâu tơring, pơlê kong kơdrâm tung kong pơlê, sap ing 14 chôu kơxê lơ 8/6, ăm phêp tơdroăng ki pơto chơ tơmối châ vêh pêi cheăng nếo la athế rak tơniăn pêi pro kơtăng mâu tơdroăng pơkâ hbrâ mơdât Covid-19.

Lâm Đồng pro pơhôi tơdroăng ki chơ tơmối, ôh tá mơdât mâu tơdroăng cheăng kâ

Vi ƀan hnê ngăn kong pơlê Lâm Đồng xuân pơkâ thế Khu ngăn troăng prôk ƀă rơxế kơtâu dêi kong pơlê tơpui tơno, pêi cheăng ƀă Khu ngăn troăng prôk ƀă rơxế kơtâu mâu kong pơlê, pơlê kong kân ki ai tơdjâk vâ môi tuăn hnê mơhno mâu troăng hơlâ tung rak ngăn pơto chơ, rak tơniăn hbrâ mơdât pơreăng xiâm kối tâ tú la ôh tá mơdât mâu tíu tê mơdró, ôh tá pro pá lơ tơdjâk ‘mêi troh mâu tơdroăng cheăng kâ tê mơdró; pêi pro klâ krê ‘na khăm pơlât tro mơngế tro pơkâ ƀă mâu ngế ki lo ing kơpong ki ai pơreăng; pơxâu phâk kơtăng mâu ngế ki ôh tá tối dêi châ chăn, tối la ôh tá tơdrăng.

Katarina Nga tơplôu ƀă tơbleăng