VOV4.Sêdang - Ƀă tơdroăng ki hdoăng lối 3 rơtuh met khô̆i têa, kum tôh ăm 600 ha klâng chiâk, long têa Proh ối tung cheăm Proh, tơring Đơn Dương, kong pơlê Lâm Đồng dế hlo ôh tá tơniăn a rơnó mê hngê, têa kân lân lu ƀă xua ai mơngế ki hdi xo kĭng.

Rơchoâ Proh, cheăm Proh, tơring Đơn Dương, kong pơlê Lâm Đồng dế tơ’nhiê xua tơdroăng ki hdi xo. Troăng ki prôk a rơchoâ hiăng tơhneăng kơroh kơrâm, pro chiâng mâu tíu kơhlong kơhlăng, têa hiu trâu xua hên rơxế kân ki hngăm prôk lăm, chơ prêi, tơnêi hmâng vâ. Tơdrêng amê, tơdroăng ki pro tơbăng, ok tơnêi hdi xo kĭng rơchoâ xuân hlo ai hên tíu pro kĭng rơchoâ chiâng xâu rơ-iô ‘na tơdroăng ki ôh tá tơniăn dêi rơchoâ. Tâi tâng mâu tơdroăng ki tơdjâk kố hiăng trâm ton hâi khế, la khu kăn pơkuâ cheăm, tơring ƀă kơ koan ki ai tơdjâk troh xuân tá hâi ai tơdroăng pêi pro ‘mâi rơnêu, thăm nếo bu pơxâu phak iâ êt bu khoh ai tê.

Pôa Đỗ Phú Hòa, Kăn ƀô̆ rak ngăn – Rơchoâ, long Đơn Dương, ngế ki rak ngăn long Proh kố ăm ‘nâi, rêm rôh hlo ai mâu ngế ki hdi xo kĭng rơchoâ mê khu kố hiăng pro hlá mơ-éa ƀă pơkâ thế khu pơkuâ cheăm pơkâ tơleăng. Laga, ki hên mâu tơdroăng mê pơrá lôi ton, pơkâ tơleăng hmâng vâ pro tơdroăng ki hdi xo kĭng rơchoâ Proh chiâng ôh tá chiâng kâi mơdât. Pôa Đỗ Phú Hòa tơbleăng, nôkố hiăng ai ki iâ hlái 35 rơpŏng hdi tơnêi ối tung kĭng rơchoâ rak vế long têa kố:

“Tối tơdjuôm, tung rak ngăn rơchoâ, long, mâu tơdroăng ki trâm tơdjâk hên troh tơdroăng. Tâng ai ngế ki lâi ki pin ôh tá pơkâ tơleăng kơtăng mê kô pro ton ƀă rế hía rế ôh tá tơniăn tơ’nôm. Nôkố, tơnêi tíu rế hía rế to kơnâ, mâu tơdroăng ki pro xôi đi đo hlo. Tâng ôh tá pơkâ tơleăng kơtăng mê kô pơtối ai nếo tơdroăng ki môi tiah mê, xơpá ăm tơdroăng rak ngăn long, rơchoâ”.

Kuăn pơlê djâ dêi kơmăi, hdi kĭng ‘noăng rơchoâ Proh

Môi tiah tơdroăng ki pơkâ tơleăng hmâng vâ, ôh tá kơtăng dêi khu pơkuâ cheăm Proh cho tơdroăng ki hdi xo tơnêi long têa Proh a hâi lơ 11/4/2021. Drêng châ ‘nâi pôa Nguyễn Xuân Hải, ối a pơlê kân Thạnh Mỹ, tơring Đơn Dương djâ dêi rơxế lăm gu, hdi xo tơnêi a long têa, Tíu rak ngăn rơchoâ long Đơn Dương hiăng mơdât, pơkâ thế Vi ƀan hnê ngăn cheăm Proh chêh hlá mơ-éa ƀă pơkâ tơleăng ‘na tơdroăng pro xôi. Laga, troh nôkố, pakĭng tơdroăng ki nâp liăn phak 200 rơpâu, ngế ki pro xôi mê xuân tá hâi ‘mâi rơnêu dêi tơdroăng ki pro mê, mơdrếo tơnêi tíu ki hdi xo ăm khu pơkuâ.

Tối ‘na tơdroăng ki pêi pro hrá kố, pôa Châu Văn Kỳ, Kăn hnê ngăn Vi ƀan cheăm Proh tối nhên, ôh tá ai tơdroăng ki pơkí, lơ ôh tá vâ pơkâ tơleăng lôi ton ‘na tơdroăng ki kố. Xua pôa nếo xo pêi dêi hnoăng cheăng 2 khế kố mê mâu tơdroăng tá hâi hlê plĕng nhên. Pôa ăm’nâi, kô rĕng pơkâ tơleăng khât ‘na mâu tơdroăng ki kố tung la ngiâ.

“Kơnôm ai rơchoâ kố nếo ai têa tôh ăm kế tơmeăm sap ing cheăm ki kố troh cheăm ki ‘na tá mê á ngăn nhuô̆m, la tơdroăng ki xơpá nôkố cho pro tiah lâi châ ‘nâi ƀă pơxâu phak sap ing apoăng, xua ngế ki kố hdi mê ngế ki tá xuân hdi há. Mê troăng hơlâ ki pơtối, tâng pôa ki kố pơtối ối pro xôi mê kô pơxâu phak kơtăng tâ”.

Hlo tơdroăng ki long, rơchoâ Proh tro hdi tơnêi, Tíu rak ngăn, pro long, rơchoâ Đơn Dương hiăng hên hdroh ai hlá mơ-éa pơtroh pơkâ thế mâu kơ koan ki ai tơdjâk mơdât mâu rơxế ki hngăm prôk vêh a rơchoâ. Tơdrêng amê hnối pơkâ thế khu pơkuâ cheăm pơxâu phak kơtăng mâu ngế ki pro xôi hdi tơnêi, rơchoâ, tơbriât pro tơmeăm khoăng kĭng troăng prôk. Xua tâng lôi tơdroăng kố pơtối kô tơdjâk kân troh hnoăng cheăng ƀă mơni kô ôh tá tơniăn a long rơchoâ ki rak têa tung rơnó mê hngê la ngiâ.

Quang Sáng chêh

Katarina Nga tơplôu ƀă tơbleăng