VOV4.Sêdang - Kơxo lơ 26/3, Hôi đong kong pơlê Lâm Đồng hneăng má IX hiăng pơxiâm po Hneăng hôp má 18 vâ séa ngăn tơbleăng mâu pơkâ ki kal ‘na mơnhông cheăng kâ – rêh ối pơlê pơla dêi kong pơlê. A hneăng hôp, mâu kăn séa ngăn, tơpui tơno ƀă tơbleăng ăm pêi pro tơdroăng tơkêa bro mâu pơkâ ki kal ‘na mơ’no liăn cheăng, môi tiah: Pơkâ kĭ troăng hơlâ mơ’no liăn cheăng, hơ’leh troăng hơlâ mơ’no liăn cheăng mâu tơdroăng tơkêa bro mơ’no liăn tơnêi têa; hơ’leh, tơ’nôm pơkâ mơ’no liăn cheăng ing kơxô̆ liăn ngân kong pơlê hơnăm 2021; ƀă pơkâ mơ’no liăn cheăng tơ’nôm ai pơkâ xo liăn ngân Tơnêi têa hơnăm 2021.

Hneăng hôp roh má 18 Hô̆i đong kong pơlê Lâm Đông hneăng 9

Ki rơhêng vâ tối, hneăng hôp roh kố ối séa ngăn mơ-éa tơbleăng pơkâ troăng mơ’no liăn mơjiâng pro troăng kân ăm phep rơxế kơtâu têi Tân Phú (Đồng Nai) – Bảo Lộc (Lâm Đồng) xŏn 67 km tiô troăng khu tơrŭm tơnêi têa ƀă kuăn pơlê. Môi tơdroăng tơkêa bro troăng kân ăm phêp rơxế kơtâu têi kố kêi đeăng kô chôa ‘lâng klêi troăng kân ăm phêp rơxế kơtâu têi Dầu Giây – Đà Lạt tiô pơkâ hiăng châ Ngế pro xiâm hnê ngăn Chin phuh kĭ, mơhnhôk tơdroăng mơdêk cheăng kâ – rêh ối pơlê pơla, tơniăn gak kring cheăng lêng dêi mâu kong pơlê ối tung kơpong Tây Nguyên.

A Sa Ly tơplôu ƀă tơbleăng