VOV4.Sêdang - Kơxo lơ 17/5, Vi ƀan kong pơlê Lâm Đồng ai mơ-éa môi tuăn troăng hơlâ ăm hok tro phôh thong, mâu ngế hriâm, sinh viên mâu hngêi trung tung kong pơlê pơtối tơkŭm po tơ’noăng hriâm hneăng má II tung 3 hâi ƀă thế kêi đeăng hdrối hâi lơ 21/5 la ngiâ. Ing tơdroăng pơkâ thế dêi Khu pơkuâ hnê hriâm ƀă hnê mơjiâng tuăn ngôa rơkê kong pơlê Lâm Đồng, Vi ƀan kong pơlê Lâm Đồng môi tuăn ăm hok tro, ngế hriâm, sinh viên mâu lâm tá hâi tơ’noăng kêi hneăng hriâm má II pơtối tơkŭm po tơ’noăng a mâu hâi lơ 19, 20 ƀă 21 khế 5; mâu ngế ki ê pơtối pơtê hriâm.

Lâm Đồng thâ ăm hok tro tơ’noăng kêi hneăng hriâm má II tung 3 hâi

Mơgêi roh tơ’noăng kố, mâu hok tro, ngế hriâm, sinh viên tung kong pơlê pơtối pơtê hriâm vâ hbrâ mơdât COVID 19. Ƀă hok tro lâm 12, Vi ƀan kong pơlê pơkâ Khu pơkuâ hnê hriâm ƀă Hnê mơjiâng tuăn ngôa rơkê kong pơlê hnê mơhno tơkŭm po hriâm tơ’noăng mơgêi râ má pái phôh thong ƀă troăng mơ’no tơdrêng tung um tơvi. Krê mâu kơpong pá puât, kơpong hdroâng kuăn ngo, ôh tá ai kế tơmeăm khoăng tŭm, kih thuât vâ hriâm tơ’noăng mơ’no tơdrêng tung um tơvi mê kô chiâng tơkŭm po hriâm tơ’noăng tơkŭm laga thế krúa lĕm, xôh pơkeăng kơdê pơreăng hngêi trung hriâm, lâm hriâm, tơmeăm khoăng hnê hriâm ahdrối hok tro troh hngêi trung.

Tung pơla mâu hok tro troh hngêi trung, ôh tá tơkŭm hluâ 30 ngế hok tro/môi lâm ƀă pâng rơkong môh, xôh pơkeăng kơdê pơreăng, tối dêi ivá tơná ăm ƀok thái pơkeăng, ối kơtăn hơngế, rak tơniăn mâu pơkâ ‘na hbrâ mơdât pơreăng.

A Sa Ly tơplôu ƀă tơbleăng