VOV4.Sêdang - Tơmâng tơdroăng ki hnê mơhno dêi Ngế pro xiâm hnê ngăn Chin phuh, tơdroăng ki hnê mơhno dêi mâu khu xiâm, kơvâ cheăng Tơnêi têa, klêi kơ’nâi mơgêi leh tơbleăng Tơdroăng “Hyôh ƀă kơmăi vi tĭnh ăm vâi o”, hâi lơ 12/9, kăn hnê ngăn Vi ƀan kong pơlê Lâm Đồng cho pôa Trần Văn Hiệp hiăng pơkâ thế, hnê mơhno mâu khu râ, kơvâ cheăng, tíu pêi cheăng tơrŭm chêh pro hlá mơ-éa, túa pơkâ pêi pro nhên tơbleăng.

Kong pơlê kô mơjiâng Khu mơhnhôk vâ krếo thế, mơhnhôk mâu kơxô̆ liăn veăng tơlo sap ing khu pơkuâ kong pơlê, khu mơdró kâ, khu tơrŭm, kuăn pơlê tung kong pơlê rơtế tơdjuôm ivá tŏng kum ăm khu râng liăn ƀă liăn mâ lơ veăng kum kơmăi vi tĭnh, ki hdrối tâ cho a mâu tơring tung kong pơlê ki trâm pá, tíu ki tá hâi ai hyôh, hok tro, sinh viên kơtiê, vâ chê kơtiê.

Khu ngăn tối pơtâng tơdroăng kal tiô troăng hyôh um tơvi, rơ’jiu tơrŭm ƀă Khu ngăn hnê hriâm ƀă hnê mơjiâng tuăn ngoâ rơkê séa ngăn mâu tơring, cheăm kơpong hngế hngo; mâu rơpŏng kơtiê, rơpŏng vâ chê kơtiê vâ chêh inâi mâu vâi o hok tro tá hâi ai vi tĭnh, kế xúa tung hriâm tơdrêng ing troăng hyôh Internet.

Katarina Nga tơplôu ƀă tơbleăng