VOV4.Sêdang - Khu pơkuâ cheăng pêi Mô đô̆i rong ƀă pơlê pơla tơrŭm ƀă Khu pơkuâ Đoân droh rơtăm kong pơlê Lâm Đồng tơkŭm po leh tơdah ăm Khu râng liăn tŏng kum vâi hdrêng kong pơlê ƀă tơdroăng diâp hnoăng liăn hriâm rơkê tung pơlê kong kơdrâm Đà Lạt. A roh leh, Kŏng ti tơlo liăn cheăng Ôm hyô Sài Gòn – Đại Ninh hiăng diâp ăm 2 rơtal liăn ăm Khu pơkuâ râng kơxô̆ liăn tŏng kum vâi hdrêng kong pơlê Lâm Đồng.

Jâ Trần Thị Chúc Quỳnh – Kăn pơkuâ hnê ngăn Đoân droh rơtăm kong pơlê Lâm Đồng diâp hnoăng liăn hriâm rơkê ăm mâu vâi o ai  tơdroăng rêh ối pá puât

Klêi kơ’nâi tơdah, Khu tơkŭm po hiăng diâp 500 hnoăng liăn hriâm rơkê, rêm kơxuô kơnâ 1 rơtuh liăn ăm mâu vâi o hok tro ai tơdroăng rêh ối pá puât dế rêh ối, hriâm tâp a mâu hngêi trung ƀă mâu tíu tŏng kum pơlê pơla tung pơlê kong kơdrâm Đà Lạt. Kố cho tơdroăng ki pơxúa mơhno tơdroăng tơmâng tŏng kum dêi mâu khu pêi cheăng pơlê pơla ƀă khu tê mơdró tơmiât troh mâu hok tro ai  tơdroăng rêh ối pá puât.

A Sa Ly tơplôu ƀă tơbleăng