VO4.Sêdang - Maluâ tro tơdjâk xua pơreăng COVID-19, la tung pơla sap ing khế 1 troh khế 3 hơnăm kố mâu tơring, cheăm tung kong pơlê Lâm Đồng xuân châ tơ’lêi hlâu tung tơdroăng ki tăng cheăng pêi ăm vâ chê 6 rơpâu ngế pêi cheăng, veăng kum mơdêk pêi lo liăn, tơniăn tung rêh ối. Tung kơxô̆ vâ chê 6 rơpâu ngế pêi cheăng châ tăng cheăng pêi mê tung mê, ai lối 1.830 ngế ai cheăng pêi ki nếo, lối 100 ngế lăm pêi cheăng a kong têa ê, châ 20% túa pơkâ, tâk 10% tâng vâ pơchông ƀă khế kố hơnăm nah.

Tơdrêng amê Kơvâ ngăn cheăng pêi mố đô̆i rong ƀă pơlê pơla tơkŭm po mâu tơdroăng tiâ mơnhên, tơbleăng tơdroăng cheăng pêi, pêi pro tŏng kum hriâm cheăng tơtro ƀă mâu túa pơkâ, pêt, rak ngăn kơphế, pêi kơchâi reăng tiô chal nếo, păn mơnăn, tơkŭm hnê cheăng pêi ki ôh ti xê pêi chiâk deăng môi tiah: hâng pơklep meăm, ‘mâi rơnêu kế tơmeăm xúa on tơhrik, pong rơgi tơmeăm loăng, pơchoh hmân ếo, ƀă hên ki ê.

Kố cho mâu cheăng ki tơtro nôkố dế châ mâu kŏng ti, khu mơdró kâ a kong pơlê ai tơdroăng ki rơhêng vâ xúa, veăng kum rak tơniăn túa pơkâ tăng cheăng pêi ăm 13 rơpâu – 15 rơpâu ngế pêi cheăng tung hơnăm 2021 dêi kong pơlê Lâm Đồng.

Katarina Nga tơplôu ƀă tơleăng