VOV4.Sêdang - Riân sap ing 6 chôu troh 12 chôu hâi dế lơ 24/5, Việt Nam ai 33 ngế tâ pơreăng COVID-19 ki nếo, tung mê 28 ngế a kong pơlê Bắc Giang, 4 ngế a Hải Dương ƀă 1 ngế a Đà Nẵng. 28 ngế châ ‘nâi tung kơpong mơdât, ai tơdjâk troh tíu ki ai pơreăng Kơpong cheăng ƀă kơmăi kơmok Quang Châu, Vân Trung, Đình Trám. Riân troh 12 chôu hâi lơ 24/5, Việt Nam ai tâi tâng 3.823 ngế tung tơnêi têa ƀă 1.485 ngế cho ing kong têa ê mot tung tơnêi têa pin.

Tiô tơdroăng ăm ‘nâi sap ing Khu ngăn ‘na Pơlât ƀă Tôh ki séa ngăn mâu ngế ki tâ pơreăng COVID-19 riân troh lơxo lơ 24/5, Việt Nam dế pơlât ăm 2.258 ngế tâ COVID-19, tung mê ai lối tơdế kơxô̆ ngế ôh tá hlo tơngê, kơ-ko.

Pôa Nguyễn Hồng Sơn, ngế xiâm phŏ ngăn pơkeăng tối nhên tơdroăng ki mâu ngế tâ COVID-19 tung rôh kố phá tơ-ê ƀă Đà Nẵng. A Đà Nẵng, ki hên mâu ngế ki tâ a hneăng ki râ lơ tâ mâu pơreăng ki hiăng ai sap ing ton. Laga, a rôh kố, túa pơreăng ai xiâm kối ing Ấn Độ, pakĭng tơdroăng ki tâ tú rĕng, ai mâu ngế hơnăm ối nếo, ôh tá hlo kơ-o, tơngê la poh tơbrêi, ôh tá ‘nâi klâi, châ kum ăm hiâm ƀă kơmăi.

Katarina Nga tơplôu ƀă tơbleăng