VOV4.Xơ Đăng - Leh tơbâ mâu kuăn pơlê hlâ ƀă mâu kăn ƀô̆, lêng pleăng dêi hnoăng, hiăng hlâ tung rôh ai pơreăng kân COVID-19 tâ tú kô po a 8 chôu kơmăng hâi lơ 19/11 a 2 tíu ki xiâm cho Công viên Thống Nhất (Hà Nội) ƀă Hô̆i trường Thống Nhất (Pơlê kong kân Hồ Chí Minh). A Công viên Thống Nhất (Hà Nội) kô ai 300 ngế kăn, ƀă a Hô̆i trường Thống Nhất (Pơlê kong kân Hồ Chí Minh) kô ai 1 rơpâu ngế kăn veăng ai mâ.

Pakĭng mê, Pơlê kong kơdrâm Thủ Đức ƀă mâu pơlê krâm, tơring xuân kô tơkŭm po mâu tíu ki mơ’no um vâ séa ngăn tơdrêng Leh tơbâ a Hô̆i trường Thống Nhất. Rêm tíu ki mơ’no kố ai dâng 100 ngế kăn veăng. Tơdroăng ki châ tơkŭm po a Hô̆i trường Thống Nhất ai: mơđah mâu um méa, tơdroăng kal; tơpui dêi kăn hnê ngăn Vi ƀan xiâm Măt trâ̆n Tơnêi têa Việt Nam. Klêi mê, klăng ai 8 chôu 30 phut kong măng kô po tơdroăng leh tơbâ kuăn pơlê ƀă kăn ƀô̆, ki pleăng dêi hnoăng cheăng ki hiăng hlâ tung pơla ai pơreăng kân COVID-19.

Katarina Nga tơplôu ƀă tơbleăng