VOV4.Sedang -  Hâi kố, lơ 22/5, klêi kơ’nâi môi pơla hbrâ nhên ƀă tơkôm, hneăng tâ phĭu rah xo kăn teăng mâ Kuô̆k hô̆i hneăng má XV ƀă Hô̆i đong hnê ngăn kuăn pơlê rêm râ hneăng hơnăm 2021 – 2026 hiăng pơxiâm ƀă mâu kong pơlê, tíu cheăng châ tơkŭm rĕng po hdrối.

Ƀă kơpong Tây Nguyên, tung hâi kố, dâng 12 rơpâu ngế kuăn pơlê, a 63 tôh tâ phĭu, a mâu kong pơlê Dak Lak, Kon Tum ƀă Dak Nông, phiu ro pêi pro hnoăng cheăng dêi tơná ing mâu kơtâ phĭu ki vâ rah xo, kum tơdroăng rah xo mâu kăn teăng mâ ai hiâm mơno lĕm tro – tuăn ngôa pêi cheăng rơkê kơhnâ châ mot cheăng tung Kuô̆k hô̆i ƀă Hô̆i đong kuăn pơlê rêm râ. 

Tíu tâ phĭu hdrối a Đak Ung (Kon Tum)

Klêi kơ’nâi 12 rơpâu ngế kuăn pơlê pêi klêi dêi hnoăng cheăng dêi tơná, lối 4 rơtuh 100 rơpâu ngế kuăn pơlê tâ phĭu, ối tung vâ chê 50 hdroâng mơngế tung rơpŏng kân mâu hdroâng mơngế Việt Nam a Tây Nguyên, kô lăm tâ phĭu a 5 rơpâu 817 tôh tâ phĭu vâ rah mâu kăn teăng mâ ai hiâm mơno lĕm – tuăn ngôa pêi cheăng rơkê, mot tung khu kăn teăng mâ Kuô̆k hô̆i hneăng má XV ƀă Hô̆i đong kuăn pơlê rêm râ hneăng hơnăm 2021 – 2026.

A Sa Ly tơplôu ƀă tơbleăng