VOV4.Sêdang - Tiô Khu xiâm pơkuâ cheăng pêi – Mô đô̆i rong râ ƀă Rêh ối pơlê pơla, klêi kơ’nâi môi khế pêi pro Pơkâ kơxô̆ 68/NQ-CP ‘na mâu troăng hơlâ tŏng kum mơngế pêi cheăng ƀă mơngế xúa mơngế pêi cheăng trâm pá puât xua pơreăng COVID 19 (dó inâi cho Pơkâ 68/NQ-CP) ƀă Pơkâ 23/2021/QĐ-TTg, kơxô̆ mơngế pêi cheăng hiăng châ tŏng kum tung lâp tơnêi têa cho lối 13 rơtuh ngế,  ƀă kơxô̆ liăn cho vâ chê 6.000 rơtal liăn.

Ki nhên, Pơlê kong kân Hồ Chí Minh hiăng tơdah xing xoăng kơxô̆ liăn tŏng kum ăm kuăn pơlê, mơngế pêi cheăng 788 rơtal liăn. Bình Dương hiăng tơdah 349 rơtal liăn. Hà Nội tơdah 386,8 rơtal liăn, Bến Tre tơdah 32 rơtal liăn, Hậu Giang tơdah 12,3 rơtal liăn ƀă hên kong pơlê ki ê pơrá hiăng châ tơdah kơxô̆ liăn tŏng kum dêi Chin phuh.

Tơdroăng ki phiu ro cho tâi tâng mâu kong pơlê hiăng thăm pêi pro châ tơƀrê ƀă rĕng. Ing mê, lâp tơnêi têa ai chât rơtuh ngế kuăn pơlê châ tŏng kum ing troăng hơlâ, rơtuh ngế pêi cheăng châ tŏng kum ƀă kơxô̆ liăn a ngâ.

A Sa Ly tơplôu ƀă tơbleăng