VOV4.Sêdang - Hâi lơ 26/3, Rôh hôp má 18 Hô̆i đong hnê ngăn kong pơlê Lâm Đồng hneăng má 9 hiăng tơbleăng tơdroăng pơkâ ‘no liăn cheăng mơjiâng pro tơdroăng tơkêa cho troăng kân Tân Phú, kong pơlê Đồng Nai – Bảo Lộc, kong pơlê Lâm Đồng ƀă tâi tâng kơxô̆ liăn ‘no hneăng má 1 ai 16.408 rơtal liăn. Troăng ki kố xŏn 67 km, tung mê, ai 11 km tơkâ luâ tơring Tân Phú dêi kong pơlê Đồng Nai, 56 km ki u ối cho tơkâ luâ mâu tơring Dă Huoai, Dă Teh, Bảo Lâm ƀă Pơlê kong kơdrâm Bảo Lộc dêi kong pơlê Lâm Đồng.

Túa pơkâ troăng rơdâ 22 m ƀă 4 to troăng rơxế ô tô kơtâu, 2 to troăng ki rơxế pơtê tơdrêng. Troăng ki kố châ klâ pro 2 hneăng, tung mê, hneăng má môi châ pro sap ing hơnăm 2021 troh 2025. Tâi tâng kơlo liăn ‘no hneăng má môi ai 16.408 rơtal liăn, tung mê liăn tơnêi têa dâng 6.500 rơtal liăn, u ối cho liăn xua khu ki ‘no liăn cheăng tơlo.

Katarina Nga tơplôu ƀă tơpbleăng