VOV4.Sêdang  -  Hâi lơ 9/6, a Hà Nội, Khu xiâm kŏng an tơkŭm po hneăng hôp Khu hnê mơhno tơdroăng tơkêa bro mơjiâng kơxô̆ ki chêh ‘măn tung kơmăi tơnêi têa ‘na pơ’leăng mâ mơngế ƀă tơdroăng tơkêa bro, pêi pro, ăm ƀă rak ngăn theh căn cước kuăn pơlê. Đăi tươ̆ng Tô Lâm, Ngế cheăng tung Khu xiâm kal kí, Ngế xiâm ngăn Khu xiâm Kŏng an, Ngế pơkuâ hnê mơhno hneăng hôp. Riân troh hâi lơ 7/6, hiăng ai lối 35 rơtuh ngế kuăn pơlê hiăng châ ăm kơxô̆ hdró inâi tơná. Tiô tơdroăng tối hdrối, troh hâi lơ 18/6, Khu xiâm kŏng an kô ăm 90% kơxô̆ hdró inâi ăm mâu kuăn pơlê tung lâp tơnêi têa.

Pôa Tô Lâm tối nhên, Kŏng an mâu tíu pêi cheăng, cheăm tơring kong pơlê pôi tá tơngôu, pôi tá rĕng môi tuăn ƀă tơdroăng ki hiăng pêi pro mê thế pơtối mơ-eăm, thế nhên khât tâ nếo vâ pê klêi hnoăng cheăng pơcháu, a ngiâ cho mâu tơdroăng cheăng pêi tơdrêng sap nôkố ta troh hâi lơ 1/7, ƀă mâu tơdroăng cheăng pơtối pêi rêm hâi klêi lơ 1/7.

Hlối thế Khu xiâm Kăn sát rak ngăn ‘na tơnêi tíu ‘na rak tơniăn pơlê pơla pơtối hnê tối ăm Kŏng an cheăm tơring kong pơlê pê klêi tơdroăng pro krúa kơxô̆ chêh ‘măn tung kơmăi, tâi tâng ‘măn tung kơmăi vâ ăm kơxô̆ hdró inâi mơngế kuăn pơlê a hâi lơ 18/6/2021 tiô pơkâ kơxô̆ chêh ‘măn tro krúa lĕm dâng lâi mê kô ăm kơxô̆ hdró inâi mơngế troh dâng mê. 

Gương tơplôu ƀă tơbleăng