VOV4.Sêdang - Kơmăng hâi lơ 12/4, ai lối 500 ngế sinh viên Lếo, Kul dế hriâm tâp a Pơlê kong kân Hồ Chí Minh rơtế veăng tung tơdroăng cheăng mơhno túa lĕm tro drêng rôh Têt khôi hmâ Bunpimay (Lếo) ƀă Chol Chnam Thmay (Kul). Tơdroăng kố xua Khu pơkuâ ngăn Đoân droh rơtăm Pơlê kong kân Hồ Chí Minh ƀă kăn teăng mâ Lếo ƀă kăn teăng mâ Kul a pơlê kong kân Hồ Chí Minh tơkŭm po.

Kố cho tơdroăng cheăng mơhno tối ki tơmâng ngăn, tŏng kum ăm sinh viên Lếo, Kul dế hriâm tâp a mâu hngêi trung đăi hok a Pơlê kong kân Hồ Chí Minh tung rôh Têt khôi hmâ Bunpimay dêi Lếo ƀă Chol Chnam Thmay dêi Kul po a tơdế khế 4 rêm hơnăm.

Tơdroăng cheăng kố ối pro tơ’lêi hlâu vâ đoân viên droh rơtăm Pơlê kong kân Hồ Chí Minh, sinh viên Lếo ƀă sinh viên Kul ai rôh tăng ‘nâi ‘na tơdroăng roh ton nah tơrŭm cheăng pơla Việt Nam – Lếo – Kul, veăng kum pro ăm tơdroăng tơrŭm cheăng tiô khôi hmâ, tơrŭm tơroâ pơla droh rơtăm pái tơnêi têa.

Katarina Nga tơplôu ƀă tơbleăng