VOV4.Sedang - Tiô chêh inâi dêi mâu kong pơlê, lâp tơnêi têa ai tâi tâng 69.198.594 ngế pêi pro hnoăng tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026 a hâi lơ 23/5 la ngiâ. Hô̆i đong tâ phĭu Tơnêi têa nếo achê kố hiăng ai hlá mơ-eá ăm phêp mâu kơpong tâ phĭu tung péa kong pơlê Kon Tum ƀă Dak Lak châ tơkŭm po tâ phĭu hdrối tâ tâng pơchông ƀă hâi tâ phĭu lơ 23/5/2021 hiăng châ Kuô̆k hô̆i pơkâ.

A kong ơlê Kon Tum, Hô̆i đong tâ phĭu Tơnêi têa môi tuăn ăm phêp mâu kơpong tâ phĭu a hâi lơ 22/5 a mâu cheăm Ngọc Linh, Mường Hoong, Đăk Man, Đăk Plô, Đăk Nhoong, Đăk Long ối tung tơring Đăk Glei ƀă Đông mô đô̆i gak tíu tơkăng kong cheăm Đăk Xú dêi cheăm Đăk Xú, tơring Ngọc Hồi hdrối tâ lối 1 hâi tâng pơchông ƀă Hâi tâ phĭu lâp tơnêi têa.

A Dak Lak, Hô̆i đong tâ phĭu tơnêi têa môi tuăn ăm phêp mâu kơpong tâ phĭu rĕng tâ môi hâi ối tung mâu khu lêng tung tơring Ea Súp, tơring Ƀuôn Đôn ƀă pơlê kong kơdrâm Ƀuôn Ma Thuột.

A Sa Ly tơplôu ƀă tơbleăng