VOV4.Sêdang - Tiô tơdroăng, kơxo lơ 24ơxơxiâm po hneăng hôp má mơ’nui dêi Kuô̆k hô̆i hneăng má 14, ƀă tiô tối hdrối pêi cheăng tung plâ 12 hâi. Tung mê, ai hên chôu hôp tơpui ‘na tơdroăng rah xo mâu kăn pêi cheăng. Kuô̆k hô̆i tơpui ‘na tơbleăng tơdroăng pêi cheăng hneăng XIV dêi Kuô̆k hô̆i; hneăng hơnăm 2016 – 2021 dêi Kăn xiâm hnê ngăn tơnêi têa, Chin phuh, Hngêi tơleăng xiâm, Kơ koan hnê arak luât tơnêi têa, Kơ koan xêo ngăn tơmeăm khoăng tơnêi têa.

Hngêi hôp kân Diên Hồng tung Hngêi kân Kuô̆k hô̆i Việt Nam

Pakĭng mê, cho séa ngăn tơbleăng ăm pêi pro Pơkâ hneăng hôp má 11, Kuô̆k hô̆i hneăng má XI; Luât hbrâ mơdât ma tŭi ‘mâi rơnêu. Kuô̆k hô̆i kô tơkŭm po ăm pơtê pôu râng hnoăng cheăng ƀă pôa Nguyễn Phú Trọng, Kăn xiâm hnê ngăn tơnêi têa, pôa Nguyễn Xuân Phúc, Ngế pro xiâm hnê ngăn tơnêi têa, jâ Nguyễn Thị Kim Ngân, Kăn xiâm hnê ngăn Kuô̆k hô̆i; tơdrêng amê, rah xo kăn ki pôu râng hnoăng cheăng kố ƀă troăng tâ phĭu kí.

Kăn xiâm hnê ngăn tơnêi têa ki nếo, Ngế pro xiâm hnê ngăn tơnêi têa ki nếo, Kăn xiâm hnê ngăn Kuô̆k hô̆i ki nếo kô tơbleăng inâi mâu ngế pro kăn klêi kơ’nâi châ Kuô̆k hô̆i rah xo.

A Sa Ly tơplôu ƀă tơbleăng