VOV4.Sêdang - Khu kăn ki pêi dêi hnoăng cheăng dêi Vi ƀan Măt trâ̆n tơnêi têa Việt Nam kong pơlê Lâm Đồng hiăng troh pôu ƀă rơkâu leh Phật Đản - Phật lịch 2565 hơnăm 2021 a chuô Tổ Đình Linh Quang ƀă Chuô Linh Sơn, pơlê kong kơdrâm kong kơdrâm Đà Lạt. A mâu tíu troh pôu, kăn hnê ngăn Vi ƀan Măt trâ̆n tơnêi têa Việt Nam kong pơlê hiăng pơtroh rơkong rơkâu tơniăn lĕm má môi troh mâu khu ki tiô khôp ƀă tâi tâng mâu ngế ki hriâm vâ pro jâ ƀok phop hơniâp ro.

Tơdrêng amê, hnối tơmâng xo ƀă mơnhên tối mâu tơdroăng ki veăng tŏng kum dêi mâu jâ ƀok phop ƀă tâi tâng mâu ngế ki tiô khôp tung tơdroăng ki pêi pro tiô troăng hơlâ pơkâ dêi Đảng, luât dêi Tơnêi têa, malối cho tung hnoăng cheăng tối tơbleăng hbrâ mơdât pơreăng COVID-19 a kong pơlê.

Teăng mâ mâu Khu ki pơkuâ tơdroăng khôp Phop dêi kong pơlê kong kơdrâm Đà Lạt hiăng mơnê tơdroăng ki tơmâng ngăn, tŏng kum dêi Vi ƀan Măt trâ̆n tơnêi têa Việt Nam kong pơlê tối krê ƀă khu pơkuâ tơdroăng kal kí dêi kong pơlê tối tơdjuôm hiăng đi đo pro tơ’lêi hlâu ăm tơdroăng khôp Phop rế hía rế châ mơnhông rơdêi.

Katarina Nga tơplôu ƀă tơbleăng