VOV4.Sêdang - Hneăng hôp Kuô̆k hô̆i má 14 hiăng mơgêi ƀlêi chiâng ƀă tơdroăng ki rah xo khu kăn pêi cheăng, tung mê, ai Chin phuh hneăng ki nếo. Klêi kơ’nâi to krâ kơlŏng dêi pôa Phạm Minh Chính, Ngế pro xiâm hnê ngăn Chin phuh xuân môi tiah mâu khu râ ki nếo dêi Chin phuh, mâu kăn Kuô̆k hô̆i hiăng mơhno tối loi tơngah ƀă pói rơhêng vâ dêi môi Chin phuh pơkâ pêi ki rơkê nếo, tơdrăng khât.

Mâu kăn tơmâng xo ƀă khĕn kơdeăn khât kơ pôa Phạm Minh Chính, Ngế nếo to pro Ngế pro xiâm hnê ngăn Chin phuh, cho ngế ki pêi cheăng kơtăng, ai tuăn tơmiât ‘nâi hơ’leh, hriăn pêi ki nếo, ai tuăn tơmiât pôu hnoăng cheăng pêi, ivá pêi cheăng châ mơhno nhên ing mâu tơdroăng cheăng pêi tung pơla pôa xo pêi mâu hnoăng cheăng nah.

Pôa Bùi Sĩ Lợi, Khu kăn Kuô̆k hô̆i kong pơlê Thanh Hóa tối:

‘’Ƀă ngế pro xiâm hnê ngăn Chin phuh, kố cho um méa dêi mơngế ki pơkuâ xiâm pêi cheăng kơtăng, pêi tro hnoăng cheăng pơcháu ti tá ‘nâi plĕng mâu tơdroăng drêng pôa dế pro Kăn ơkuâ hnê ngăn Đảng kong pơlê Quảng Ninh, klêi mê, pro Ngế pơkuâ khu tơrŭm cheăng xiâm tơnêi têa ƀă cho ngế ki hlê plĕng ‘na luât pơkâ dêi Đảng.

Ƀă tơdroăng ki mê, tơdroăng mơ-eăm pêi cheăng kơtăng khât, hlối hmâ lăm troh a mâu tíu, a tơngah khât á Ngế pro xiâm hnê ngăn cho ngế ki pêi cheăng kơtăng khât, tơkŭm pêi a mâu tơdroăng ki kal dêi tơnêi têa, tơleăng mơnhên mâu tơdroăng ki ối tô tuăn hdrối ‘nôi ki kuăn pơlê dế tơkôm ngah’’.

Ai mâu hơnăm pêi cheăng ton rơtế ƀă pôa Phạm Minh Chính, Ngế pro xiâm hnê ngăn tơnêi têa drêng pôa pro Kăn ơkuâ hnê ngăn Đảng kong pơlê Quảng Ninh, jâ Đỗ Thị Lan, khu kăn Kuô̆k hô̆i kong pơlê Quảng Ninh ai tối tiah kố:

“Pôa Phạm Minh Chính, Ngế pro xiâm hnê ngăn tơnêi têa đi đo mơhno nhên ăm hlo cho ngế ki’nâi hriăn plĕng, ‘nâi tơmiât ngăn hơngế ƀă cho ngế ki hlối pêi cheăng hlối ai pôu râng dêi mâu tơdroăng cheăng, tơmâng ngăn nhên pêi tro tiô troăng hơlâ dêi Tíu xiâm ƀă xua ing hnoăng ki pơxúa dêi kuăn pơlê ƀă xua tơdroăng mơnhông tơnêi têa. Tung pơla pêi cheăng a Quảng Ninh ngin hlo nhên mâu tơdroăng cheăng dêi Ngế pro xiâm hnê ngăn tơnêi têa hiăng pêi.

Pơtih tơdroăng cheăng hơhnhôk tăng liăn ‘no mơjiâng tơmeăm khoăng troăng prôk, tung tơdroăng mơjiâng pơkâ, djâ tơdroăng pơkâ vâ pêi môi tiah tơdroăng pơkâ hdrối ‘na mơjiâng pro mâu kơpong hngêi kơmăi, kơpong cheăng kâ, tơrŭm pơla mâu kơpong cheăng kâ ƀă tơnêi têa, mơhnhôk tăng liăn vâ mơnhông mơdêk tơrŭm tơdrâng tơ’mô ƀă hên ki ê, klêi mê, hơ’leh cheăng tơ’lêi ‘na pro hlá mơ-eá’’.

‘Na pôa Nghiêm Vũ Khải, Khu kăn Hải Phòng tối: Ki xơpá xuân môi tiah tơdroăng pơloăng mơnúa, nôkố tung tơdroăng cheăng mâu kăn tối tơchoâm ƀă tơdroăng pơkuâ cheăng tung Chin phuh tối krê mê cho tung pơla ai tơdroăng ‘nâi rơkê hơ’leh. Mê cho tơdroăng ki Ngế pro xiâm hnê ngăn Chin phuh ki nếo ƀă Khu kăn cheăng tung Chin phuh tung hneăng ki nếo kal thế tơmâng pêi pro:

“Tung pơla tơnêi têa ai hên rôh ki pro tơ’lêi hlâu la ôh tá iâ tơdroăng pơloăng mơnúa ƀă ai mâu tơdroăng pơloăng mơnúa tơdrêng hlối tung tơrá tơdroăng cheăng dêi mâu kăn, mê cho ‘mâi hơ’leh tuá pêi cheăng,‘na liăn ai hên tơdroăng cheăng hiăng pêi tơ-brê.

La xuân ai hên mâu tơdroăng tơvâ tơvân, pêi hâi teăm tro tung tối tơbleăng hdrối mâu tơdroăng nếo ai tung lâp plâi tơnêi ƀă mơnhên mâu tơdroăng ki nếo ai mê, kố cho tơdroăng ki thế rơkê ƀĕng ƀeăn hlo tơdroăng ki hơ’leh nếo ‘na cheăng kâ, ‘na hyôh kong prâi, ‘na tơdroăng ‘no liăn pêi cheăng mơjiâng tơmeăm khoăng.

Pin thế xúa kơmăi kơmok ki dâi lĕm, hơ’leh nếo, hriăn plĕng tơdroăng cheăng ki nếo ôh tá xê to tung tơdroăng cheăng ‘na Khoa hok kơmăi kơmok mê tung tơdroăng cheăng rak ngăn, tối tơbleăng hdrối ‘na pêi pro tơmeăm tê mơdró, ‘na tê mơdró ƀă mâu kong têa tung lâp plâi tơnêi xuân thế hơ’leh nếo, hbrâ rơnáu hdrối vâ tơrŭm tơrôa ƀă vâ mơnhông cheăng kâ châ tơ-ƀrê krá tơniăn ton”.

A rôh hôp mê, Kuô̆k hô̆i hiăng kĭ rah xo 2 Ngế pro xiâm phŏ hnê ngăn Chin phuh ƀă 12 ngế xiâm, ngế pơkuâ kơvâ cheăng. Mâu kăn tối, mâu ngế ki châ rah xo pro Ngế pro xiâm hnê ngăn tơnêi têa, Ngế xiâm pơkuâ, ngế pơkuâ mâu kơvâ cheăng rôh kố cho mâu ngế ki hiăng pêi cheăng ton hơnăm hiăng rơkê tung pơla pêi cheăng a mâu kong pơlê, hiăng hlê tung rak ngăn kơvâ cheăng ƀă hiăng mơ-eăm pêi klêi hnoăng cheăng tơná. Malối cho ivá cheăng, ki rơkê, ‘na tuăn ngôa, tuăn mơno lĕm, ki djâ troăng ahdrối ƀă châ mâu kăn Kuô̆k hô̆i, mâu kăn tung Chin phuh ƀă kuăn pơlê vâ môi tuăn.

Kố cho mâu tơdroăng ki tơ’lêi hlâu ăm mâu kăn kơvâ cheăng pêi klêi hnoăng cheăng tơná tung la ngiâ. Pôa Phạm Văn Hòa, Khu kăn Kuô̆k hô̆i kong pơlê Đồng Tháp ai tối tiah kố:

“A tơmiât ki hdrối, mâu tơdroăng cheăng pêi, mâu hnoăng cheăng dêi mâu ngế ki pêi hdrối ‘măn ăm troh nôkố ki hâi pêi pro dêi Kơ kơan, tíu pêi cheăng dêi tơnêi têa dêi mâu tơdroăng ki púi vâ, tuăn tơmiât púi vâ dêi kuăn pơlê vâ mâu kăn, hnê mơhno pêi khŏm kâi hnoăng cheăng pơcháu pêi la ngiâ.

Vâ mâu kăn kơvâ cheăng ki mê pêi klêi hnoăng cheăng tơná vâ ai tiô tơdroăng púi vâ dêi mâu kăn Kuô̆k hô̆i hiăng rah xo. Mâu tơdroăng ki mê ki pá dêi kuăn pơlê amê, mâu kăn dêi kơvâ cheăng xuân thế tơrŭm pơkâ pêi pro hnoăng cheăng tơná ƀă mơ-eăm pê klêi mâu tơdroăng xơpá ê”.

Krê to ƀă kơvâ Hnê hriâm ƀă hnê mơjiâng tuăn ngôa rơkê, jâ Nguyễn Thị Việt Nga, Khu kăn Kuô̆i hô̆i kong pơlê Hải Dương púi vâ, Ngế xiâm kô rĕng pơkâ mâu troăng hơlâ ki nhên vâ kơvâ cheăng hnê hriâm ai mâu tơdroăng pêi pro tro tŭm tâi tâng, malối cho ki tơ-ƀrê ‘na hnê hriâm, hnê môi tiah tơdroăng pơkâ Hneăng hôp roh má 13 dêi Đảng:

“Ngin tơngah tung hneăng la ngiâ, Khu xiâm ngăn hnê hriâm kô pơkâ luât ki tơtro tâ, kơtăng tâ vâ mơnhông tơ-ƀrê lơ ‘mâi hơ’leh hnê hriâm mê, ôh tá xê tơdroăng cheăng pê klêi môi hâi, peá hâi mê thế tí tăng ngăn nhên hdrối ‘nôi thế nhoăm ngăn inhên khât ‘nôi.

Pin pôi tá rĕng thâ lôí râ tung pơkâ hơ’leh ‘na tơdroăng mê, mơhé vâ hơ’leh ‘na liăn ngân thế ai hlá mơ-eá ki chêh ngăn hdrối ‘nôi. Pin thế séa ngăn nhên, ai troăng hơlâ ki nhên, ai hâi khế hơnăm hbrâ rơnáu nhên, pôi tá rĕng thâ’’.

Môi tiah rơkong tối tơbleăng a ngiâ Kuô̆k hô̆i, pôa Phạm Minh Chính, Ngế pro xiâm hnê ngăn tơnêi têa púi vâ rơtế ƀă mâu ngế tung Chin phuh kô pêi tâi ivá tơná, mơ-eăm tơkâ luâ xơpá, pơloăng mơnúa, pơtối rak vế pêi pro tơdroăng ki lĕm ton nah ƀă túa pêi cheăng ‘ló tro; mơ-eăm rơtế ƀă mâu vâi pú ki cheăng tung Chin phuh tơrŭm môi tuăn, pêi cheăng tơdrăng lĕm, pêi kơtăng, pêi tơ-ƀrê, pêi tá hiâm mơno vâ mơnhông tơnêi têa, pêi cheăng ăm kuăn pơlê. Pin loi khât kơ mâu hâi la ngiâ tơnêi têa kô xông tơ-ƀrê tâ.

Gương tơplôu ƀă tơbleăng