VOV4.Sêdang - Mâu kong pơlê ôh tá tơngôu, hbrâ mâu tơdroăng drêng ai pơreăng COVID 19 xông tâ tú tung kong pơlê’’. Kố cho rơkong tơpui tối dêi pôa Nguyễn Thanh Long, Ngế xiâm pơkuâ ngăn pơkeăng ƀă khăm pơlât a Hneăng hôp mơ’no tơdrêng tung um tơvi “Thăm hbrâ mơdât pơreăng COVID 19” ƀă 63 kong pơlê, pơlê kong kơdrâm tơkŭm po kơxo lơ 16/4. Xông tơpui pơxiâm po hneăng hôp, pôa Nguyễn Thanh Long tối nhên;  Tơdroăng pơreăng COVID 19 xuân xông tâ tú tung lâp plâi tơnêi, tơdroăng mơdât pơreăng tung hơnăm kố cho pơloăng mơnúa kân ƀă mâu kong têa ƀă tá Việt Nam.

Tiô kăn xiâm ngăn pơkeăng ƀă khăm pơlât tối, tơnêi têa pin hiăng tơkâ luâ 3 rôh ai pơreăng, troh nôkố hiăng châ 21 hâi tơnêi têa ôh tá ai ngế ki lâi tâ COVID-19  tung pơlê pơla, mâu tơdroăng cheăng dêi kuăn pơlê môi tiah hiăng vêh tiah hmâ. Sap ing mâu rôh ai pơreăng mê hiăng hlê plĕng hên tơdroăng vâ hbrâ mơdât tro tâ pơreăng COVID-19.

Pôa Nguyễn Thanh Long, kăn xiâm ngăn pơkeăng ƀă khăm pơlât tối nhên: kơpong ki xiâm má môi nôkố cho a kơpong tơkăng kong peăng mâ hâi lo pa hdroh ƀă mâu kong pơlê Tây Nam Bộ. Xua mê, mâu kong pơlê kal mơdêk hbrâ mơdât troăng tơkăng kong. Khu xiâm ngăn pơkeăng ƀă khăm pơlât hiăng tơrŭm ƀă Khu xiâm pơkuâ ngăn Mố đô̆i gak tơkăng kong mơdêk mơ’no mâu lêng troh a mâu tíu gâk a troăng tơkăng kong.

A Sa Ly tơplôu ƀă tơbleăng