VOV4.Sêdang - Măng tĭng hdrối, Vi ƀan hnê ngăn Măt trâ̆n tơnêi têa Việt Nam mâu kong pơlê tung kơpong Tây Nguyên hiăng pêi pro klêi tơdroăng tơkŭm po roh hôp tăng rah mơngế ro pro kăn roh má 3, vâ chêh xo inâi mâu ngế ki tơxâng, rơkê kơhnâ khât vâ to pro kăn Kuô̆k hô̆i hneăng 15, kăn teăng mâ Hô̆i đong kuăn pơlê dêi kong pơlê hneăng 2021-2026. Mâu kong pơlê, tơring, cheăm a kơpong kố hiăng hbrâ rơnáu krâu khât vâ tâ phĭu tro tiô pơkâ, tro tiô luât.

A hneăng hôp tơpui tơno roh má 3 dêi kong pơlê Gia Lai, klêi tơpui tơno ai tâi tâng mâu kăn vâ môi tuăn ƀă inâi ki chêh 10 ngế lo tơbriât pro kăn Kuô̆k hô̆i hneăng 15. Hneăng hôp hiăng tiâ vâ ăm 3 ngế ki pâ lo ing inâi ôh tá ai inâi veăng tơbriât pro kăn Kuô̆k hô̆i hneăng 15. Hneăng hôp hiăng chêh klêi tŭm 119 ngế ki lo tơbriât pro kăn hnê ngăn Hô̆i đong kong pơlê Gia Lai hneăng má 12, hneăng hơnăm 2021-2026.

Tio jâ Rơchăm H’Yéo, ngế cheăng tung Vi ƀan tâ phĭu kong pơlê Gia Lai, ngế ki pâ thế xut tah inâi gá tung inâi ki lơ tơbriât pro kăn Kuô̆k hô̆i hneăng 15 xuân hiăng pâ vâ lo xêh ôh tá ai tơdroăng klâi tơdjâk mâu ki ê, tung kơxô̆ ki vâ lo tơbriât pro kăn Kuô̆k hô̆i hneăng 15.

“Klêi hôp tơpui tơno roh má 3 á hlo ai pái ngế pâ thế xut tah inâi tung inâi mâu ngế vâ rah xo kăn Kuô̆k hô̆i rôh má 15 kố, mê klêi hôp tơpui tơno ƀă tơmâng xo mâu tơdroăng veăng hnê khĕn dêi kuăn pơlê mê pái ngế ki ai tŭm ivá vâ lo tơbriât pro kăn Kuô̆k hô̆i, la mâu ki mê hiăng pâ thế xut tah inâi ôh tá tơbriât pro kăn Kuô̆k hô̆i xếo. Tiô a tơmiât thế nhoăm tơdroăng ki vâi pâ, tơdroăng kố  ôh tá tơdjâk troh ‘na mơngế ki ê tung khu kăn Kuô̆k hô̆i dêi kong pơlê Gia Lai”.

Pôa Đinh Ngọc Hải, Kăn phŏ hnê ngăn Vi ƀan Măt trâ̆n tơnêi têa Việt Nam kong pơlê Gia Lai tối, klêi hôp tơpui tơno roh má 3, Vi ƀan hnê ngăn kong pơlê  hiăng chêh tŭm inâi 14 ngế ki veăng lo tơbriât pro kăn Kuô̆k hô̆i hneăng 15 (tung mê Tíu xiâm tơnêi têa tơbleăng inâi 4 ngế, kong pơlê ai 10 ngế).

“Klêi ăm ‘nâi mâu tơdroăng a hneăng hôp tơpui tơno roh má 3 mê kô chêh inâi khât ing mê Khu kăn dêi Măt trâ̆n tơnêi têa Việt Nam ƀă mâu kăn rêm râ kô tơrŭm ƀă Vi ƀan rơtế mơjiâng tơdroăng pơkâ mâu ngế ki lo tơbriât pro kăn Kuô̆k hô̆i xuân môi tiah mâu ngế lo tơbriât pro kăn hnê ngăn Hô̆i đong kong pơlê tơkŭm trâm mâ kuăn pơlê vâ mơhnhôk tâ phĭu vâ mơhno hnoăng cheăng tơná.

Ing mê kum ăm kuăn pơlê ‘nâi nhên hnoăng cheăng tơrêm ngế ki châ rah xo kô mơhno hnoăng cheăng dêi tơná tung mơjiâng tơdroăng pơkuâ hnê ngăn rêm râ môi tiah lâi”.

Dak Nông tơkŭm po Hneăng hôp tăng rah mâu ngế to pro kăn roh má 3

A kong pơlê Dak Lak, măng tĭng hdrối, tơdrêng ƀă tơdroăng tơkŭm po Hneăng hôp tơpui tơno roh má 3, Vi ƀan Măt trâ̆n Tơnêi têa Việt Nam kong pơlê hiăng tơbleăng kơxô̆ ki ăm hlo drêng xo tơdroăng veăng hnê tối ƀă rah xo dêi kuăn pơlê a tiú ki ối, môi tuăn ƀă inâi mâu ngế ai tŭm ivá lo tơbriât pro kăn Kuô̆k hô̆i  hneăng 15, ƀă lo tơbriât pro kăn Hô̆i đong hnê ngăn kong pơlê  hneăng hơnăm 2021-2026.

Klêi tơpui tơno, a hneăng hôp roh má 3, mâu kăn hiăng têk kŏng tiâ vâ môi tuăn ƀă inâi 11 ngế  ki veăng lo tơbriât pro kăn Kuô̆k hô̆i hneăng 15 (hâi teăm riân 4 ngế ki xúa Tíu xiâm tơnêi têa tơbleăng); môi tuăn ăm 1 ngế lo ing inâi tơbriât pro kăn Kuô̆k hô̆i hneăng 15. Hneăng hôp vâ môi tuăn ƀă inâi 125 ngế ai tŭm ivá vâ lo tơbriât pro kăn hnê ngăn Hô̆i đong kong pơlê, hneăng hơnăm 2021-2026.

Jâ Nguyễn Thị Thu Nguyệt, Kăn hnê ngăn Khu vâi kơdrâi Việt Nam kong pơlê Dak Lak ăm ‘nâi: Vâ ai tro tiô pơkâ 30% ngế cho mâu ngế kơdrâi châ rah xo kăn hnê ngăn Hô̆i đông rêm râ, Khu kăn kô tơkŭm po 4 lâm hnê hriâm a mâu tơring Krông Ana, Ea H’leo ƀă pơlê kong kơdrâm Ƀuôn Ma Thuột, ‘măn ăm lối 300 ngế vâi kơdrâi roh apoăng veăng lo tơbriât pro kăn Hô̆i đong rêm râ:

“Ngin tơmiât kố cho môi tơdroăng pêi pro vâ kơjo kum teăm tơdrêng ăm mâu ngế ki lo tơbriât pro kăn hlê ‘na tơdroăng mơhnhôk tơbriât pro kăn vâ rak tơniăn tiah kố mâu ngế ki lo tơbriât mê kô hlê, ôh tá kơmêi, khên tơnôu vâ mơhnhôk tâ phĭu ki hiăng vâ chê troh châ tơ-ƀrê má môi. Malối tiô kơxô̆ pơkâ cho mơ-eăm bro tơniăn ai 30% ngế lo tơbriât mê cho mâu kơdrâi châ kuăn pơlê rah xo pro kăn hnê ngăn Hô̆i đong rêm râ”.

A kong pơlê Dak Nông, klêi hôp tơpui tơno, tâi tâng mâu kăn ki veăng hôp hiăng têk kŏng tiâ vâ môi tuăn ƀă inâi mâu ngế ki ai tŭm ivá lo tơbriât pro kăn Kuô̆k hô̆i hneăng 15 ai 10 ngế (tung mê, tơbleăng 2 ngế, kong pơlê tơbleăng 8 ngế) ƀă vâ môi tuăn ăm 3 ngế hiăng ai hlá đơn pâ lo ôh tá veăng tơbriât pro kăn Kuô̆k hô̆i hneăng 15.

Pakĭng mê, Hneăng hôp xuân hiăng chêh inâi 88 ngế ai tŭm ivá lo tơbriât pro kăn hnê ngăn Hô̆i đong kuăn pơlê dêi kong pơlê Dak Nông hneăng hơnăm 2021-2026. Pôa Điểu Xuân Hùng, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Nông tối ăm ‘nâi:

“Klêi hneăng hôp tơpui tơno roh má 3 mơgêi, hnoăng cheăng dêi Vi ƀan dêi Măt trâ̆n tơnêi têa Việt Nam kong pơlê Dak Nông, ngin kô chêh klêi inâi mâu kăn Kuô̆k hô̆i hneăng má 15 ƀă Hô̆i đong hnê ngăn kong pơlê. Ngin kô lăm troh a mâu cheăm tơring, séa ngăn nhên kơxô̆ kuăn pơlê, ki lâi hâi teăm tro ối tơvâ lơ chêh hâi tro vâ tơniăn tro môi tuăn, tro tiô luât. Rơtế ƀă tơdroăng séa ngăn  tâi tâng mâu kăn Kuô̆k hô̆i hneăng 15 ƀă Hô̆i đong hnê ngăn kuăn pơlê rêm râ, ngin kô mơhnhôk mơngế lo tơbriât môi tíu ki iâ gá 10 hdrôh, ‘na mâu kăn hnê ngăn Hô̆i đong kong pơlê môi tíu ki iâ gá 5 hdrôh tiô luât pơkâ”.

Klêi hôp tơpui tơno roh má 3, Vi ƀan tâ phĭu dêi mâu kong pơlê tung kơpong Tây Nguyên kô pơtối pêi mâu roh vâ mâu ngế ki lo tơbriât pêi pro tơdroăng mơhnhôk tâ phĭu, tơbleăng ăm kuăn pơlê ‘na tơdroăng vâ pêi pro dêi tơná vâ pêi hnoăng cheăng dêi ngế kăn tâng châ rah xo ƀă tơpui mâu tơdroăng ‘na kuăn pơlê  tơmâng vâ ‘nâi plĕng.

Quốc Học rah chêh

Gương tơplôu ƀă tơbleăng