VOV4.Sêdang - A hneăng hôp Khu hnê mơhno cheăng tơnêi têa ‘na hbrâ tơplâ mơdât pơreăng COVID-19 nếo po a mơ’nui măng tĭng hdrối nah, pôa Vũ Đức Đam, Ngế pro xiâm phŏ hnê ngăn tơnêi têa hiăng pơkâ thế mâu kong pơlê, pơlê kong kân kal athế ai troăng phôn tối tơno tơdrêng, mê cho khu ngăn ‘na pơkeăng ƀă khăm pơlât troh a tơrêm pơlê cheăm vâ pơtối tơdah, séa ngăn, veăng kum khăm pơlât a tíu tơníu ối ăm kuăn pơlê ki nhôm lơ tro tâ pơreăng COVID-19 ƀă mâu tơdroăng châi tamo ki ê.

Troh nôkố, pơreăng ki pro chiâng pơreăng nếo inâi cho Gamma hiăng hlo ai a 81 to kong têa ƀă pơreăng ki pro chiâng Delta a 142 to kong têa ƀă tung kơpong. Khu xiâm ngăn pơkeăng ƀă khăm pơlât tối, ƀă pơreăng ki pro chiâng Delta, pơreăng ki mê dế tâ tú rơ-iô, kơdrâ tâ tú rĕng, ki pro tâ tú gá rĕng ƀă hlối pro hlâ mơngế hên a mâu kong têa tung lâp plâi rơnêi, malối a kơpong Đông Nam Á.

A Việt Nam, rôh pơreăng tú má 4 kố, lâp tơnêi têa tối ai lối 243 rơpâu ngế tâ, tung mê pơreăng tâ tú roh má 4 lâp tơnêi têa ai 243 ngế tâ, tung mê, a Pơlê kong kân Hồ Chí Minh ai lối 137 rơpâu ngế tâ tú. Khu xiâm ngăn pơkeăng pơlât tối: pơreăng mơni kô ối tâ tú ton, malối a Pơlê kong kân Hồ Chí Minh ƀă mâu kong pơlê achê peăng Hroh tơnêi têa. Mâu kong pơlê mơni kô vêh tâ tú nếo, mơnhâu ‘mêi troh ivá, tơdroăng hlâ rêh dêi kuăn pơlê, pro tơdjâk kân trong tơdroăng mơnhông cheăng kâ rêh ối.

Tơdroăng ki hiăng ‘nâi ing Pơlê kong kân Hồ Chí Minh ƀă mâu kong pơlê peăng Hdroh tơnêi têa ăm hlo, ki xiâm dêi pơreăng tâ tú cho pro ôh vâ tá kơtăng ’na klâ kơtăn, klâ krế thế ối hơngế dêi rơpó tiô pơkâ 16. Mâu tíu pêi cheăng, khu mơdró ƀă mâu ngế kuăn pơlê ối tơngôu pro tơná ôh tá bê xâu kơ pơreăng, ôh tá vâ hbrâ rơnáu, ối tơkŭm tơpui tơno pú hên, hâi vâ klâ krê pơla hngêi ki kố ƀă hngêi ki tá tung kơpong klâ krê.

‘’Luât pơkâ châ ‘nâi thế rĕng tối kô kơdroh, klâ krê ôi kơtăng kô ăm hlo hlối ki kơdroh, môi tiah khăm ngăn mơheăm a kong pơlê, tíu xiâm hnê mơhno tiô pơkâ, a  pơlê cheăm kong pơlê, tiô hnê mơhno tiô pơkâ, a kong pơlê hiăng ai mâu cheăm ai mâu ki ‘nâ hiăng ai mâu khu rơté ƀă tâi tâng pơkâ thế. Ki xiâm pơkâ thế F0 lo ing kuăn pơlê, tiah mê ‘nôi nếo chía tơ’lêi vâ tăng ngế ki tâ tú  tung kuăn pơlê’’.

Khu ngăn pơkeăng cho mâu ngế cheăng pơlât, ƀok thái pơkeăng, mâu thái cô hnê mâu ngế ngăn pơkeăng, sinh viên y khoa… mâu ngế lăm pleăng hnoăng tơná ki lo ing peăng Kơnhŏng tơnêi têa lăm veăng kum Pơlê kong kân Hồ Chí Minh mơdât COVID-19

A hneăng hôp, mâu ngế tung khu hnê mơhno, tối nhên túa cheăng pêi ki kân má môi a kong pơlê ăm hlo tâi tâng, hlối kring rơtâ tá kơpong ki ‘’hâi ai ngế tâ pơreăng’’, hlối kring gak tâ tá, ăm kơdroh ki tơ’lêi tâ tú; tung pêi pro klâ kơtăn pơlê pơla tiô pơkâ 16, mâu kong pơlê kal pơtối rak vế hnoăng cheăng dêi mâu khu tơrŭm, khu grup, tôh COVID-19 tung kuăn pơlê, tâi tâng kuăn pơlê, mâu ngế ki xiâm cho kŏng an, vâ ‘’prôk lăm tơrêm hơlâ troăng, pôu tơrêm hngêi, tăng êng ngăn tơrêm ngế vâ ‘nâi tâi tâng mâu ngế ki lo ing tíu ê, vâ pơxâu kơtăng ngế ki lâi ôh tá vâ tơbleăng tối tơná ăm khu ngăn pơkeăng ‘nâ hía ôh tá vâ tối tơdrăng.

Tiô pôa Vũ Đức Đam, Ngế pro xiâm phŏ hnê ngăn tơnêi têa drêng hiăng pêi pro klâ kơtăn pơlê pơla tơniăn tro tiô tơdroăng thế ‘’Ngế ki lâi ối ulâi thế ối amê’’. Ƀă tơdroăng khăm ngăn mơheăm, ai mâu vâ khăm ngăn rĕng, ôh tá vâ khăm ngăn RT-PCR, xua mê, Ngế pro xiâm hnê ngăn tơnêi têa thế tơdroăng khăm ngăn mơheăm thế cho tơdroăng pêi ki xiâm, nhên khăm ngăn tro tiô khoa hok, tơ-ƀrê.

Mâu kong pơlê kal thế tơkŭm mơngế hên tâ ăm mâu râ khăm pơlât pá xôp vâ pơlât tơdrêng, teăm pơlât ngăn mâu ngế ki rế râ ai tŭm mơngế, pơkeăng, oxy pơkeăng, hbrâ tơmeăm khăm pơlât tro tiô pơkâ vâ bê xoăng koi pơlât. Pôa Vũ Đức Đam, Ngế pro xiâm hnê ngăn tơnêi têa tối nhên:

‘’Mâu kong pơlê thế mơjiâng tơdrêng hlối troăng kơxái phôn krếo tơdrêng, mâu khu ngăn pơkeăng kuăn pơlê lăm troh tơrêm hngêi kuăn pơlê vâ tơdah, séa ngăn, kum khăm pơlât amê ăm ngế ki lâi kuăn pơlê ki lâi tâng ‘nâi ‘nâi tâ COVID-19 xuân môi tiah ‘na châi tamo tơdroăng ki ê, kong pơlê ki lâi ai đô̆i cơ động thế mơjiâng hên tâ, mâu tíu ki ‘nâ thế riân tá tơdroăng klâ kơtăn mê thế ai khu pơcháu chiân tơmeăm, la khu ki shiper nôkố kal khât ‘nâng, mâu kong pơlê nôkố xuân thế tơmâng khât troh mâu khu lăm chiân tơmeăm pakĭng khăm ngăn mơheăm, pâk vaccine mê rơxế thế rơxế thế nhên há châ ăm kŏng an ‘nâi mê cho rơxế shiper. Tơdroăng mê thế hbrâ rơnáu nhên xua mê cho tơdroăng hriâm ki hlâ rêh’’.

Tung tơdroăng khăm pơlât, pôa Vũ Đức Đam, Ngế pro xiâm hnê ngăn tơnêi têa tối tiah kố, túa pêi cheăng hiăng hlê ing Pơlê kong kân Hồ Chí Minh ƀă mâu kong pơlê peăng Hdroh tơnêi têa ăm hlo: Thế klâ krê kơpong tơdah apoăng ƀă mâu ngế ki tâ COVID-19 la tung châ hâi tâ ai tơdroăng châi klâi, hâi chiâng tối vâi cho mâu ki tamo, vâ khăm ngăn tơtro ‘na ăm kâ trếo kơhiâm, ăm châ vâi ai ivá vâ tơplâ mơdât pơreăng kơdroh kơxô̆ mơngế F0 ki hiăng tâ ai tơdroăng châi tung châ.

Hlo pơreăng dế tâ tú rĕng hlối rơ-iô, kơxô̆ mơngế tâ COVID-19  ó  rế hên, pôa Nguyễn Thanh Long, Ngế xiâm ngăn pơkeăng ƀă khăm pơlât hiăng kĭ a hlá mơ-éa pơtroh ăm thế pêi pro tơdrêng ăm mâu tíu pêi cheăng dêi kơvâ ngăn pơkeăng ‘na mơdêk hnê hriâm, mơdêk ki rơkê tung khăm pơlât tơdrêng, pơlât ăm ivá mo lĕm.

Ing mê tâi tâng mâu tíu khăm pơlât chêh inâi, hnê tơdrêng, ăm hriâm tơdrêng vâ ai tuăn rơkê hlo tung pơlât tơdrêng, pơlât ăm ai ivá vêh mo lĕm, hnê mâu ngế ngăn pơkeăng, ƀok thái pơkeăng. Hdrối mê, pôa Nguyễn Thanh Long kĭ pơkâ tơdroăng tơkêa bro ‘’Mơdêk rơkê tung tơdroăng pơlât tơdrêng, mơdêk ivá mo lĕm ăm mâu ngế ki dế pơlât COVID-19 ki râ ‘’hnê mơhno ƀă mơjiâng 12 Tíu pơlât xiâm hồi sức tích cực COVID-19 dêi tơnêi têa, cho tíu pơlât tơdrêng, mơdêk ivá mo lĕm ki hên ai sap 200-300 to xoăng koi pơlât Hồi sức tích cực pro a mâu hngêi pơkeăng.

Vâ mơhnhôk hơlêm mâu ngế cheăng pơlât, ƀok thái pơkeăng-mâu ngế ngăn pơkeăng ki lăm pêi cheăng khăm pơlât a Pơlê kong kân Hồ Chí Minh ƀă mâu kong pơlê peăng Hdroh plâ mơdât pơreăng COVID-19, Khu xiâm ngăn mơngế pêi cheăng Việt Nam pơkâ ‘na tơdroăng tŏng kum mơdêk ăm kâ kơhiâm mâu rôh kâ kế, pơkeăng ki plâ mơdât pơreăng COVID-19. Ing mê, mâu ngế châ xúa cho mâu ƀok thái pơkeăng, điều dưỡng, mâu kăn ƀô̆ ngăn pơkeăng ing mâu hngêi pơkeăng xiâm mâu sinh viên, hok viên dêi mâu hngêi trung hriâm ’na pơkeăng dêi Khu xiâm ngăn pơkeăng pơlât (ƀă mâu kong pơlê) châ mơdêk pêi pro a 19 to kong pơlê peăng Hdroh dế klâ kơtăn pơlê pơla tiô pơkâ kơxô̆ 16. Kơlo tŏng kum ƀă tơmeăm kơnâ 1 rơtuh liăn môi ngế .

VOV1

Gương tơplôu ƀă tơbleăng