VOV4.Sêdang - Drêng pơreăng COVID 19 xông tâ tú ó tá tung tơnêi têa ƀă kơpong Tây Nguyên tối krê, vâi krâ kal plĕng tâ mê nếo tung tơdroăng pêi tiô pơkâ dêi Khu xiâm pơkuâ ngăn pơkeăng ƀă khăm pơlât ‘na hbrâ mơdât pơreăng ƀă tơtrŏng ‘na troăng hbrâ mơdât tâ tú virus tung pơlê pơla.

Virus COVID 19 mơhé cho virus nếo laga tơdroăng tâ tú xuân môi tiah mâu virus hdrối mê, phá tơ-ê kân má môi dêi virus kố cho tâi tú rĕng, pá vâ mơdât ƀă pơlât. Tiô Ƀok thái pơkeăng Lê Quốc Hùng – Kăn pơkuâ kơbong Hngêi pơkeăng nhiêt đơ̆i, Hngêi pơkeăng Chợ Rẫy, virus COVID 19 klêi kơ’nâi mot a kơpong krôk kô mot tung mâu tê̆ ƀao tung châ ƀă pro chiâng hên, klêi mê ai hrĭng to kuăn virus ki ê. Pơreăng virus ki kố ai kuăn hên pro ‘nhê troăng mơheăm tung châ, chiâng lo pa gong, rêm to virus mot tung môi tê̆ ƀao nếo, tơdroăng kố pro chiâng hên xôh ƀă rế hiá rế ai hên tung châ.

Hneăng ki kố tối cho hneăng tâ tú hên pơreăng, mơngế djâ virus ôh tá ‘nâi xua mê ôh tá ‘nâi tơná hôm tro tâ pơreăng lơ ôh. Laga a hneăng kố virus kô chiâng tâ tú ăm mơngế ki ê, tơdroăng ki kố cho rơ-iô khât.

-Hâi khế rêh dêi virus

Virus ối rêh pa gong 3 chôu, a pêng kơtâ hlá mơ-éa 1 hâi ƀă 3 hâi drôu meăm pa kong. Xua mê thế đi đo rak tơniăn mơgrúa tơmeăm xúa xuân môi tiah tíu rêh ối. Thế pâ, ƀă tíu rêh ối krúa lĕm, pin kô kơdroh hên tơdroăng ki tâ tú dêi pơreăng.

Ki nhên khât, virus châ tơniăn drêng hyôh tô iâ ƀă hngiâm kơchoh mê virus kô rêh ối ton tâ, ki rơhêng vâ tối cho tung hngêi xŏn lơ ai kơmăi hngíu. A pa gong kong tô, ai ki tô mâ hâi ƀă phuâng lĕm mê kô kơdroh tơdroăng tâ tú dêi virus. Xua mê thế tơtrŏng troh tơdroăng lôu péa phuâng lĕm rak kruá lĕm tíu rêh ối.

-Virus ôh tá chiâng vâ mot tung kéa ki lĕm ôh tá tro hbáu ou.

Drêng ối achê ƀă pơreăng, thế xếo kŏng ƀă kơƀŏng krúa lĕm. Drêng châ ai kéa hbáu ou mê ôh tá chiâng troh kơpong ai pơreăng lơ ối achê ƀă mơngế tro tâ pơreăng, đi đo mơgrúa kơnêi kŏng, kơnêi chêng vâ kơdroh vi khuẩn châ mot tung châ.

Vâ ví tâ tú virus tung hbrâ mơdât pơreăng COVID 19, rơtế ƀă pêi krâu rơhí rơhó tơdroăng hnê thế pêi pro 5K dêi Khu xiâm ngăn pơkeăng ƀă khăm pơlât, vâi krâ kal chôu vế, drêng xếo kŏng kal thế châ ki vâ iâ 20 yâi, pơlêo rơdêi pơla mâu kơpeăng kŏng, kố cho môi tung mâu troăng vâ tah virus. Kơƀŏng gá pro hê kơtôu lipid dêi virus, thăm nếo ƀă ki tô mê pơreăng virus ôh tá kâi vâ rêh. Xua mê, vâi krâ nhŏng o ƀă pú hmâ kô chiâng xúa têa hơtô vâ xếo kŏng ƀă thế chôu vế xếo ƀă kơƀŏng. Mâu tơmeăm ki ‘nâ ai trếo al-côl sap ing 65% kô pro hê râ rơmâ dêi virus, ki má lối cho mâu trếo têa pơkeăng xếo kŏng, xôh kơdê pơreăng ai xêt khât vâ kơdê virus môi tiah pói vâ.

Phượng Vũ – Đình Thi rah chêh

A Sa Ly tơplôu ƀă tơbleăng