VOV4.Sêdang - Drêng ai tơdroăng ki tá hâi tơniăn, xua pơreăng COVID-19 xông tâ tú hên ó a kong têa Kul, kong têa kố ai kuăn pơlê tro tâ pơreăng kơdrâm ó khât, môi tiah a kong pơlê Mondulkiri, tíu ki tơdjêp ƀă 2 tơring Ea Súp ƀă Ƀuôn Đôn dêi kong pơlê Dak Lak xuân hiăng ai mơngế ki tâ tú pơreăng COVID-19, tiô kơ tơdroăng khŏm kâi châ mơdât pơreăng, ôh tá ăm châ tâ tú ing kong têa ê mot tung tơnêi têa pin, mâu Đông gak tíu tơkăng kong a kong pơlê Dak Lak hiăng ăm mâu lêng gak ngăn plâ hâi plâ măng a mâu tíu ki gak, ƀă ai kơdrâm khu lêng ki lăm pơtui vâ khoh teăm kâi châ mơdât mơngế mot lo a troăng tíu tơkăng kong. Tơdrêng amê, thăm mơ’no hên lêng, rơxế, kế tơmeăm vâ hbrâ mơdât mâu ngế ki prôk lăm drô troăng tíu tơkăng kong.

Cho ngế veăng tung tơdroăng ti tăng mơngế tro tâ pơreăng ƀă mơdât teăm tơdrêng 12 ngế tơkâ hluâ tíu tơkăng kong ôh tá tro luât ing kong têa Kul tơkâ troăng tíu tơkăng kong ối tung tơring Ea Súp kơmăng hâi lơ 25/4 pơla kố nah, Trung ŭi Cao Tiến Dũng, dế pêi hnoăng cheăng a tíu hbrâ mơdât pơreăng COVID 19 dêi đông mô đô̆i gak tíu tơkăng kong Ia Rvê hơ‘muăn.

“Klêi kơ’nâi hmuâ gak ngăn ƀă gâk tât châ hlo mơngế tro tâ mê lăm ti tăng mâu ngế ki tro ƀă châ hlo mâu ngế ki mot tung tơring mê tơbleăng ăm khu râ cheăng tơrŭm ƀă mâu khu râ cheăng tung cheăm vâ mơdât ƀă pêi tơdroăng klâ kơtăn teăm tơdrêng. Tâng tíu tơkăng kong vâi châ mot tung tơring mê kô tơdjâk ó xua mê ngin thế pôu râng hnoăng cheăng kơcheăng, mơdêk hnoăng tâ mê nếo, hbrâ mơdât pơreăng môi tiah tơplâ mơdât lêng kong têa ê’’.

Mô đô̆i gak kring tíu tơkăng kong gâk a tíu hbrâ mơdât pơreăng COVID 19 tíu tê mơdró ngi kong têa ê Dak Ruê

Tiô Đăi ŭi Hoàng Văn Tuân, Kăn phŏ đông Mô đô̆i gak kring tíu tơkăng kong Ia Rvê tối, sap ing hâi lơ 25/4 troh nôkố, a mâu troăng kân tíu tơkăng kong dêi tơring Ea Súp, mô đô̆i gak kring tíu tơkăng kong hiăng tơrŭm ƀă khu cheăng teăm tơdrêng châ hlo ƀă mơdât 3 roh tơdroăng ƀă 17 ngế tơkâ hluâ tíu tơkăng kong ôh tá tro luât.

Mơnhên tung la ngiâ, tơdroăng kô kố pơtối ai nếo, xua mê, đông lêng hiăng mơhnhôk nhŏng o tơkâ hluâ pá puât, pá ‘na kong prâi, tơnêi tíu kong kế vâ pêi tơtro hnoăng cheăng dêi tơná ƀă khŏm mơ-eăm tơniăn lĕm, tơniăn păng ‘nâng a tíu tơkăng kong:

“Khu cheăng cho iâ, laga mơngế ki kố hmâ prôk lăm a chôu ki pơtê cheăng ƀă kong prâi ôh tá tơniăn xuân môi tíu pêi cheăng mê a rơnó tô, tíu tơbăng, tơnêi ôh tá hơpok lĕm, kuăn pơlê pro pơxúa ing tơdroăng pá vâ mot, ôh tá mot a troăng kân mê lăm drô tíu tơkăng kong. Drêng pá puât mê, Khu hnê mơhno tíu cheăng hiăng xing xoăng hnoăng cheăng nhên gak a troăng tíu tơkăng kong ƀă hơ’leh dêi pó gak klâ rêm tôh khu pêi cheăng vâ teăng dêi pó pêi hnoăng cheăng a drô tíu tơkăng kong vâ gak ngăn khât má môi’’.

Gak ngăn a đông Ia Rvê

Ƀă a tíu gak ngăn hbrâ mơdât pơreăng COVID 19 dêi Đông mô đô̆i gak kring tíu tơkăng kong Dak Ruê, tơdroăng séa ngăn, mơdât xuân châ đông tơkŭm gak ngăn kơtăng khât, Trung tă Phùng Văn Bình, kăn ƀô̆ khăm pơlât cheăng lêng Đông mô đô̆i gâk kring tíu tơkăng kong Dak Ruê tối ăm ‘nâi:

“Nhŏng o akố séa ngăn tíu tơkăng kong gak ngăn ‘na tơdroăng hbrâ mơdât pơreăng. Tâng ai ngế tơkâ hluâ tíu tơkăng kong mê nhŏng o séa ngăn hmuâ gak rup djâ tíu klâ kơtăn dêi đông lêng. Nhŏng o akố ƀă nhŏng o tung đông ƀă hiâm mơno hbrâ mơdât pơreăng kơtăng má môi, ôh tá ăm pơreăng tâ tú a kơpong tíu tơkăng kong”.

Thươ̆ng tă Nguyễn Minh Tuyên, Kăn phŏ pơkuâ Mô đô̆i gâk kring tíu tơkăng kong dêi kong pơlê Dak Lak, tối ăm ‘nâi: Tung lâp troăng tíu tơkăng kong xŏn lối 73 km tơkăng ƀă kong pơlê Mondulkiri, kong têa Kul, mâu đông gak kring tíu tơkăng kong hiăng thăm séa ngăn, mơdât, khŏm mơ-eăm vâ mơdât tơdroăng mot ôh tá tro luât. Rơtế ƀă mê, mâu tíu cheăng tơrŭm krá tơniăn ƀă khu râ kăn cheăng Đảng, khu râ kăn pơkuâ, ki rơhêng vâ tối cho a 4 cheăm tíu tơkăng kong ối tung mâu tơring Ea Súp ƀă Ƀuôn Đôn, thăm pơtâng tối, mơdêk hlê plĕng, troăng pêi ăm kuăn pơlê tung tơdroăng hbrâ mơdât pơreăng COVID 19.

“Tíu cheăng hiăng pêi pro đi đo 6 tíu gak ngăn, 18 tôh séa ngăn ki ai mâ đi đo thăm hbrâ mâu kế tơmeăm khoăng, mơhnhôk kăn ƀô̆ mâu mô đô̆i séa ngăn gak ngăn plâ hâi plâ măng tơniăn gak kơtăng tíu tơkăng kong, khŏm ôh tá ăm ai ngế châ mot tơkâ hluâ tíu tơkăng kong ing kong têa Kul, ôh tá ăm ai tơdroăng châ mot ôh tá châ khăm ngăn mơdât’’.

Tơkâ hluâ pá puât, tơbrêi tơbrêh drô tíu tơkăng kong, kong tô khăng khoăng, rêm ngế kăn ƀô̆, mâu mô đô̆i gak kring tíu tơkăng kong pơrá plĕng khŏm mơ-eăm ôh tá ăm pơreăng COVID 19 châ mot tung kong pơlê.

Nam Trang chêh