VOV4.Sêdang - Châ ai tơdroăng ăm phêp dêi Hô̆i đong tâ phĭu Tơnêi têa, kơxo ah, lơ 22/5, 7 to đông mố đô̆i gak tơkăng kong ƀă Tiêuh đoàn huấn luyện cơ đô̆ng, ối tung Mố đô̆i gak tơkăng kong Dak Lak kô po rôh tâ phĭu rĕng hdrối tâ rôh tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn rêm râ hơnăm hneăng 2021 – 2026. Troh nôkố, mâu hnoăng cheăng hbrâ hiăng châ Khu mố đô̆i gak tơkăng kong Dak Lak tơrŭm ƀă Vi ƀan tâ phĭu kong pơlê Dak Lak hbrâ pêi pro klêi, vâ tơdah lối hrĭng ngế kuăn pơlê “ki krâ kơlŏng ngiât” lăm tâ phĭu pêi pro dêi hnoăng kuăn pơlê ƀă khu kăn pơkuâ.

Ai mâ a đông mô đô̆i gak tíu tơkăng kong kơxô̆ 373, cheăm Ia Rvê, tơring Ea Súp a mâu hâi kố, ngin tâ ki phiu ro dêi hâi tâi tâng kuăn pơlê lo lăm tâ phĭu. A kơpong tâ phĭu kơxô̆ 11 (Hngêi hôp kân đông mô đô̆i gak tíu tơkăng kong kơxô̆ 737), tơdroăng rơnuâ hngêi hôp kân, xôh pơkeăng kơdê pơreăng, tĕm inâi mâu kăn ki tơbriât to pro kăn, inâi mơngế tâ phĭu, kơthung phĭu ƀă hía hé hiăng châ hbrâ tŭm têk.

Ƀinh nhất Hà Văn Piêng 21 hơnăm, ối tung đông Mô đô̆i gak tíu tơkăng kong kơxô̆ 737 tối, kố cho hneăng tâ phĭu apoăng dêi tơná châ veăng tâ phĭu. Plâ khế kố, hbrâ chôu phut pơtê klêi kơ’nâi roh lăm pêi dêi hnoăng cheăng kring vế, ngoh rơtế khu pú đi đo troh a hngêi hôp kân, a tíu tĕm inâi mâu ngế tơbriât to pro kăn ti tăng pơchuât ngăn inâi, tíu kot mâ, tơdroăng cheăng dêi mâu ngế tơbriât to pro kăn vâ ‘nâi nhên, rah xo. Troh nôkố, rơtế ƀă tơdroăng ‘nâi nhên tơdroăng mâu ngế tơbriât to pro kăn, mê rêm ngế tung đông xuân hiăng tơdah châ kơtâ phĭu ki vâ lăm rah xo kăn, hbrâ tâ phĭu a kơxo hâi tơdrốu, lơ 22/5, rĕng hdrối tâ 1 hâi pơkâ, cho a hâi tĭng, lơ 23/5 dêi lâp tơnêi têa.

“Á đi đo pơchuât ngăn tơdroăng mâu ngế tơbriât to pro kăn tung Kuô̆k hô̆i hneăng má XV ƀă Hô̆i đong hnê ngăn kuăn pơlê rêm râ hneăng hơnăm 2021 – 2026. Á pói vâ rah xo mâu ngế ai hiâm mơno lĕm, tuăn ngôa rơkê pêi cheăng veăng tung Kuô̆k hô̆i ƀă Hô̆i đong hnê ngăn kuăn pơlê rêm râ vâ vâi kum mơ’no dêi ivá, mơ’no tuăn ngôa rơkê tơná mơjiâng pơlê pơla, tơnêi têa kro mơdrŏng’’.

Khu mô đô̆i gak tíu tơkăng kong Dak Lak tơrŭm ƀă Vi ƀan tâ phĭu kong pơlê Dak Lak hbrâ pêi kêi đeăng tâi tâng, kum tơdroăng rĕng tâ phĭu a Đông mô đô̆i gak tíu tơkăng kong ƀă Tiêuh đoân hnê cheăng lêng troh lâp lu

Thươ̆ng tă Nguyễn Xuân Sơn – Cheăng kal kí Đông mô đô̆i gak tíu tơkăng kong kơxô̆ 737 tối ăm ‘nâi, pêi pro hnê mơhno dêi Khu xiâm pơkuâ Mô đô̆i gâk tíu tơkăng kong Dak Lak xuân môi tiah râ kơpêng 'na pêi pro pơkâ rĕng tâ hâi lo lăm tâ phĭu, hên hâi hiăng hluâ, Đảng ủy ƀă Khu hnê mơhno đông tơkŭm po hên roh pơtâng tối ‘na luât tâ phĭu, tơdroăng mâu kăn teăng mâ, hnoăng ƀă tơdroăng cheăng dêi mơngế tâ phĭu troh ƀă kăn ƀô̆, mâu lêng tung đông. Pơtroh 9 ngế kăn ƀô̆ đông tơrŭm ƀă Vi ƀan tâ phĭu kong pơlê Dak Lak mơjiâng tôh tâ phĭu; chêh inâi mâu ngế tâ phĭu, tĕm tơbleăng tơdrăng mâu kăn teăng mâ vâ kăn ƀô̆ mâu lêng tơmiât nhên, rah xo.

Rơtế amê, Đảng ủy đông xuân hnê mơhno 100% ngế ai mâ đi đo, thăm séa ngăn rak tơniăn tơdroăng gak ngăn, kring vế tíu tơkăng kong ƀă mâu tíu tâ phĭu, ki má lối tung pơla ai pơreăng COVID-19 xông tâ tú ó.

“Troh nôkố, ngin hiăng hbrâ pêi kêi đeăng tâi tâng tŭm tơdroăng kum roh vâ rĕng châ tâ phĭu. Tâi tâng ƀăng-rôl, hlá mơ-éa chêh tơbleăng, inâi mơngế tâ phĭu ƀă kăn teăng mâ pơrá châ kơtúa ƀă tĕm klêi đeăng, kơthung tâ phĭu xuân hiăng hbrâ kêi đeăng; tơdroăng xing xoăng kơtâ phĭu xuân hiăng xing xoăng ăm mâu kăn ƀô̆, mô đô̆i tung đông. Pakĭng mê, xua pơreăng COVID-19 xông tâ tú ó, ngin tơkŭm po kơtăng ƀă mâu troăng mơhnhôk khu ƀok thái pơkeăng kơvâ cheăng lêng tơkŭm po xôh pơkeăng kơdê pơreăng lâp kơpong tâ phĭu, ahdrối tâ phĭu kô pêi pro tơdroăng khăm ki tô tung châ, pơkâ pâng rơkong-môh, ối kơtăn vâ tơkŭm po tâ phĭu tơniăn lĕm”.

Teăng mâ mâu Tôh tâ phĭu tĕm inâi mâu ngế lo tơbriât pro kăn kum mơngế tâ phĭu ti tăng hlê plĕng nhên tơdroăng cheăng vâi

Mô đô̆i gak tíu tơkăng kong Dak Lak nôkố pơkuâ troăng tíu tơkăng kong xŏn châ 74 km, tơkăng ƀă kong pơlê Mondulkiri, kong têa Kul. Tiô đăi tă Phạm Hữu Chiến – cheăng kal kí Mô đô̆i gak tíu tơkăng kong Dak Lak tối, xua pơrá phá dêi hên tơdroăng cheăng, châ tơdroăng ăm phêp dêi Hô̆i đong tâ phĭu Tơnêi têa, 7 đông mô đô̆i gak tíu tơkăng kong ƀă tiêuh đoân hnê mơhno ki troh lâp lu ối tung Mô đô̆i gak tíu tơkăng kong Dak Lak kô tơkŭm po hâi tâ phĭu rĕng tâ hâi tâ phĭu tơchoâm dêi lâp tơnêi têa hdrối tâ 1 hâi.

Đăi tă Phạm Hữu Chiến tối, vâ rak tơdroăng tâ phĭu tơniăn xuân môi tiah pêi pro hnoăng cheăng gak kring hnoăng pơkuâ tíu tơkăng kong tơnêi têa tung pơla tâ tú pơreăng COVID 19, đông hiăng tơrŭm ƀă Vi ƀan tâ phĭu kong pơlê Dak Lak mơjiâng 8 tôh tâ phĭu a 7 to đông mô đô̆i gak tíu tơkăng kong ƀă tiêuh đoân hnê cheăng lêng troh lâp lu kum ăm tơdroăng tâ phĭu. Tơdroăng hbrâ ăm hneăng tâ phĭu rĕng tâ hiăng châ pêi kêi đeăng tâi tâng, hbrâ tơdah mơngế tâ phĭu a mâu đông.

“Ngin tơrŭm ƀă khu râ kăn pơkuâ kong pơlê mơjiâng mâu tíu tâ phĭu, tiú tâ phĭu a mâu đông mô đô̆i gak tíu tơkăng kong ƀă tiêuh đoân hnê cheăng lêng troh lâp lu ƀă tơdroăng hbrâ hiăng kêi đeăng tâi tâng. Xua ai hnoăng cheăng phá tơ-ê dêi khu mô đô̆i gak tíu tơkăng kong thế kring vế krá tơniăn tíu tơkăng kong, hbrâ mơdât mâu ngế mot ôh tá tro luât tung tơnêi têa drêng ai pơreăng COVID-19 xông tâ tú ó, ngin kô klâ khu cheăng pơ’lêh dêi pó tơdroăng cheăng mê lăm troh a tiú tâ phĭu vâ pêi pro tơdroăng tâ phĭu; mâu khu gak hơngế tíu tâ phĭu mê khu pơkuâ tâ phĭu kô djâ kơthung phĭu troh vâ mâu kăn ƀô̆, mâu mô đô̆i a tíu gak pêi pro hnoăng tâ phĭu tro tiô luât tâ phĭu’’.

Mô đô̆i gak tíu tơkăng kong Dak Lak ai 8 tíu tâ phĭu hdrối tâ dêi hneăng Kuô̆k hô̆i hneăng má XV ƀă Hô̆i đong hnê ngăn kuăn pơlê rêm râ hneăng hơnăm 2021 – 2026

Ƀă tơdroăng hbrâ nhên ‘na kế tơmeăm khoăng, tơniăn gak ngăn, kring vế, khăm pơlât tung pơla ai pơreăng COVID-19 xông tâ tú ó dêi Mô đô̆i gâk kring tíu tơkăng kong Dak Lak ƀă Vi ƀan tâ phĭu a kong pơlê, hrĭng ngế tâ phĭu ‘’kơlŏng ngiât’’ a tíu tơkăng kong Dak Lak hiăng hbrâ ăm hâi phĭu châ phiu ro, tơkŭm lăm tâ phĭu vâ rah xo mâu kăn teăng mâ ki rơkê kơhnâ má môi cheăng tung Kuô̆k hô̆i hneăng má XV ƀă Hô̆i đong hnê ngăn kuăn pơlê rêm râ dêi hneăng hơnăm 2021 – 2026.

Tuấn Long chêh

A Sa Ly tơplôu ƀă tơbleăng