VOV4.Sêdang - Tung hên hơnăm hdrối nah, Đông mố đô̆i gâk tơkăng kong Hồ Le (Khu pơkuâ ngăn mố đô̆i gâk tơkăng kong, kong pơlê Kon Tum) hiăng mơdêk rơdêi hnoăng cheăng mơhnhôk khu lêng ƀă kuăn pơlê, pêi pro tro troăng hơlâ pơkâ dêi Đảng, luât dêi Tơnêi têa, ing mê, hiăng rak tơniăn tơdroăng gak kring tơdroăng kal kí, tơniăn tung pơlê kơpong tíu tơkăng.

Tíu Đông mô đô̆i gâk kring tíu tơkăng kong Hồ Le pơkuâ ai 8 thôn dêi 2 cheăm Ia Đal ƀă Ia Tơi (Tơring Ia H’Drai, kong pơlê Kon Tum) ƀă 717 rơpŏng, 2.245 pơ’leăng mâ mơngế, ki hên cho kŏng nhân mâu nông trương ối tung Tíu cheăng 716 (Ƀinh đoân 15) ƀă Kŏng ti tơlo liăn mơ’no cheăng ƀă Mơnhông Duy Tân. Tung 17 hơnăm hiăng hluâ, sap ing hâi mơjiâng Đông troh nôkố, pakĭng hnoăng cheăng séa ngăn, gâk kring tíu tơkăng kong, Đông mô đô̆i đi đo pêi tơtro tơdroăng pêi cheăng mơhnhôk kuăn pơlê.

Ki rơhêng vâ tối, sap apoăng hơnăm 2020 troh nôkố, Đông hiăng pơtroh khu cheăng pêi pro hnoăng lăm séa ngăn, mơdât, gâk tât rơtế hbrâ mơdât pơreăng COVID 19, rak tơniăn pơkuâ krá tơniăn tíu tơkăng kong. Tung mê, hiăng tơkŭm po vâ chê 150 roh séa ngăn troh lâp lu tíu tơkăng kong, hbrâ mơdât COVID 19.

Tơdrêng amê, pơtối pêi kơtăng troăng pơkâ pêi tíu tơkăng kong, teăm tơdrêng tung tí tăng ngăn, châ hlo, pơxâu phâk mâu ngế mot lo ôh tá tro luât tung tơnêi têa; tơkŭm po po văng troăng a mâu tơneăn ƀă troăng séa ngăn tíu tơkăng kong châ 19 km; pơtối rak 3 tôh pêi cheăng tung pơlê tơrŭm ƀă khu râ kăn pơkuâ cheăm, teăm tơdrêng tơleăng mâu roh tơdroăng ki nếo tung pơlê Đông pơkuâ.

Tung tơdroăng mơhnhôk kuăn pơlê, Đông hiăng tơbleăng ăm khu râ kăn pơkuâ cheăng Đảng, khu râ kăn pơkuâ 2 cheăm Ia Đal  ƀă Ia Tơ (tơring Ia H’Drai) thăm pêi krá tơniăn khu kăn ƀô̆ cheăm, thôn châ tơƀrê; tơbleăng hnê tơ’nôm 6 đoân viên ki kơhnâ rơkê mơjiâng ‘mot tung Đảng; tơrŭm ƀă Vi ƀan cheăm Ia Đal.

Ƀinh đoân 15 tơkŭm po tơlo Liăn “Hâi kum mơngế kơtiê’’ kong pơlê châ vâ chê 30 rơtuh liăn; lăm kơ-êng mơhnhôk 24 ngế kăn ƀô̆ mô đô̆i châi tamo, rơpŏng ai tơdroăng rêh ối pá puât kơnâ lối 9 rơtuh liăn; diâp lối 40 kơxuô tơmeăm ƀă lối 600 kên pâng rơkong môh ăm mâu rơpŏng ai tơdroăng rêh ối pá puât tro tơdjâk troh xua pơreăng COVID 19; diâp 4 hnoăng liăn ăm hok tro Hngêi trung phôh thong hdroâng kuăn ngo ai tíu kâ koi ối pơtê tơring ƀă mâu hngêi trung mâm non, râ má môi, râ má péa a cheăm Ia Đal klăng hâi pơxiâm po hriâm ƀă mơgêi hơnăm hriâm kơnâ 6 rơtuh liăn; diâp kơxô̆ liăn tơdroăng “Kum o troh hngêi trung’’ ăm 3 ngế o hok tro kơnâ 22,5 rơtuh liăn; tŏng kum 15 rơtuh liăn ăm rơpŏng 1 ngế muăn “Kuăn păn mô đô̆i gâk kring tíu tơkăng kong”.

Đông mô đô̆i gak kring tíu tơkăng kong Hồ Le khăm, xing xoăng pơkeăng tê kơtê ăm kuăn pơlê cheăm Ia Đal, tơring Ia H’Drai, Kon Tum

Pakĭng mê, Đông hiăng pơtroh 12 ngế kăn ƀô̆, mô đô̆i tơrŭm ƀă khu râ kăn pơkuâ ƀă kuăn pơlê tung pơlê veăng tơpâ on chếo 2 ha kong a kơpong thôn 8, cheăm Ia Đal ƀă tơpâ on chếo 3 ha kơdrum kơxu dêi Tíu pêi cheăng 716 ối tung thôn Ia Đer, cheăm Ia Đal; tơrŭm ƀă tíu pêi cheăng 716, Vi ƀan cheăm Ia Đal pơtâng tối kâ, ối kruá lĕm, hbrâ mơdât pơreăng a mơngế ƀă mơnăn păn châ 12 roh, ai vâ chê 330 roh ngế veăng; kum kuăn pơlê rơnêu 7 toăng hngêi hiăng tơ’nhê, lâk pôm, krí plâi hôt ƀă rak ngăn kơphế; xing xoăng ăm hdrê ƀă hnê mơhno ăm chât rơpŏng ‘na kih thuât pêt kơchâi drêh; tơkŭm po túa păn ro hdrê, tŏng kum 1 to ro hdrê ăm rơpŏng kơtiê, tơdrêng amê kum kuăn pơlê tung pơlê rơnêu kơdroăng păn, păn mơnăn krúa lĕm, tơniăn mơdât pơreăng.

Đông xuân xing xoăng 2 ngế kăn ƀô̆, mô đô̆i cho mơngế hdroâng kuăn ngo tơdah pro nhŏng o kum 2 rơpŏng kơtiê hlŭn ing kơtiê; xing xoăng 16 ngế kăn ƀô̆ mô đô̆i cho đảng viên tŏng kum 53 rơpŏng mơnhông cheăng kâ.

Pêi pro tơdroăng “Tâi tâng kuăn pơlê veăng gak kring hnoăng pơkuâ tơnêi tíu, gak kring tíu tơkăng kong tơnêi têa tung rơxông nếo’’, Đông mô đô̆i Hồ Le (ối tung Khu xiâm pơkuâ Mô đô̆i gâk kring tíu tơkăng kong dêi kong pơlê Kon Tum) hiăng pơtâng tối, mơhnhôk châ 3 khu pú hên ƀă 13 rơpŏng a cheăm Ia Đal kĭ pơkuâ xêh 13 km troăng tíu tơkăng kong, 13 tơneăn ƀă 5 tôh gâk kring kuăn pơlê kĭ  pơkuâ rak tơniăn xêh. Ƀă cheăm Ia Tơi, nôkố Đông dế tơrŭm séa ngăn, pơtâng tối mơhnhôk khu pú hên, ngế krê, rơpŏng veăng pơkuâ gak kring tơniăn a kơpong tíu tơkăng kong.

Thiê̆u tă, kăn pơkuâ Đông cho pôa Nguyễn Ngọc Văn – Kăn pơkuâ đông mô đô̆i Hồ Le mơnhên: Klêi kơ’nâi 17 hơnăm mơjiâng ƀă mơnhông cheăng, ƀă khôi túa ƀlêi trâng dêi “Mô đô̆i Pôa Hồ”, kăn ƀô̆, mô đô̆i Đông mô đô̆i gak kring tíu tơkăng kong Hồ Le ing mâu rơxông ôh tá bê xâu pá puât, hiăng rơtế ƀă kuăn pơlê mâu hdroâng mơngế rêh ối a tíu tơkăng kong râng krá hnêa gak kring tíu tơkăng kong dêi tơnêi têa rế hía rế krá tơniăn tâ’’.

Hlá tơbeăng Kon Tum

A Sa Ly tơplôu ƀă tơbleăng