VOV4.Sêdang - Khu pơkuâ ngăn Mố đô̆i gak tơkăng kong nếo ai hlá mơ-éa pơtroh ăm mâu tíu pêi cheăng dêi Khu pơkuâ ngăn Mố đô̆i gâk tơkăng kong mâu kong pơlê ki ai troăng tơkăng kong séa ngăn tơdrêng hnoăng cheăng lăm pơtrui, séa ngăn a troăng tơkăng kong vâ hbrâ mơdât pơreăng Covid-19. Tiah mê, pơkâ thế khu pơkuâ ngăn mố đô̆i gâk tơkăng kong a mâu kong pơlê tơrŭm krá ƀă mâu khu pơkuâ ƀă mơdêk tơdroăng ki tâi tâng kuăn pơlê tơbleăng mâu ngế ki mot tung tơnêi têa Việt Nam ing troăng tơkăng kong ôh tá tro luât xua Ngế pro xiâm hnê ngăn Chin phuh tơbleăng, mơhnhôk tá khu pơkuâ tơdroăng kal kí, tâi tâng kuăn pơlê pêi pro tiô túa ki tâi tâng, rơdêi, kơhnâ, tơƀrê tâ tung hnoăng cheăng hbrâ mơdât pơreăng, rak tơniăn pơlê pơla cheăm bêng, gâk kring tơniăn tung pơlê pơla a kơpong tíu tơkăng kong.

Khu pơkuâ ngăn mố đô̆i gâk tơkăng kong lăm séa ngăn a tíu gak tơkăng kong peăng kơnhŏng

Kơhnâ tối tơbleăng mâu troăng hơlâ pêi pro hnoăng cheăng, ‘nâi nhên ƀă tơbleăng tro tơdroăng, rak ngăn krá tơniăn tung kong pơlê, mâu ngế, mâu khu ki tơkŭm djâ mâu ngế ki mot tung tơnêi têa pin ôh tá tro luât ing troăng tơkăng kong vâ mơjiâng túa pơkâ hnoăng cheăng, mơnhên mâu tơdroăng tơkêa, tơplâ mơdât châ tơƀrê, tơniăn tung mâu tơdroăng cheăng.

Katarina Nga tơplôu ƀă tơbleăng