VOV4.Sêdang - Klêi kơ’nâi ngăn tung tơdroăng ki ai khât dêi hneăng cheăng 14 xuân ăm hlo: Tơdroăng ki mâu kuăn pơlê kơhnâ veăng ƀă rah pôk mâu kăn Kuô̆k hô̆i ki rơkê plĕng, hiăng kum ôh tá iâ tung tơdroăng ki ƀlêi chiâng dêi Kuô̆k hô̆i, malối cho tung tơdroăng ki mơjiâng ƀă tơkŭm pêi pro tro mâu troăng hơlâ tŏng kum hdroâng kuăn ngo. Kố cho mâu troăng hơlâ ki kal vâ mơdêk tơdroăng ki mơnhông mơdêk cheăng kâ ƀă mơdêk tơdroăng rêh ối dêi kuăn pơlê kơpong kong ngo, kơpong hdroâng kuăn ngo. Tiô tối hdrối, Kuô̆k hô̆i hneăng 15 mơ-eăm iâ hlái châ 18% ngế kăn cho hdroâng kuăn ngo.

Kuô̆k hô̆i hneăng 14 ai 86 ngế kăn cho kuăn ngo, châ 17,3%, tâng vâ pơchông ƀă tơdroăng tối apoăng ối kal ai 4 ngế. Mơhé ti mê, mâu kăn kăn Kuô̆k hô̆i teăng mâ ăm kơpong hdroâng kuăn ngo hiăng mơhno ki mơ-eăm, hnoăng cheăng pêi, veăng pêi a mâu tơdroăng mơjiâng luât, seá ngăn ƀă pơkâ mâu tơdroăng ki kal dêi tơnêi têa. Vâ  Kuô̆k hô̆i hneăng 15 pơtối rak vế pêi pro tơdroăng ki tơ-ƀrê hiăng châ pêi, malối tung mơjiâng ƀă tơkŭm pêi pro tro luât pơkâ tŏng kum hdroâng kuăn ngo kal thế mơdêk tơ-ƀrê tâ nếo tung tơdroăng cheăng dêi mâu kăn Kuô̆k hô̆i, tâ phĭu rah xo mâu kăn ki tơxâng vâ mot cheăng tung Kuô̆k hô̆i cho tơdroăng ki hên mâu kuăn pơlê púi vâ drêng tung pơla vâ po hneăng tâ phĭu rah xo kăn Kuô̆k hô̆i  hneăng 15 ƀă kăn hnê ngăn Hô̆i đong kuăn pơlê rêm râ po a hâi lơ 23/5 la ngiâ.

Pôa Phạm Giáo kuăn pơlê ối a tơring Đức Phổ, kong pơlê Quảng Ngãi tơngah:

“Mơdêk hên mâu kăn Kuô̆k hô̆i ăm kơpong xahpá, kơpong hơngế hngo, kơpong hdroâng kuăn ngo mê kô châ ‘nâi nhên tâ, plĕng hên tâ kơpong kuăn ngo hmâ hlo xahpá, kuăn pơlê iâ mơngế hriâm ôh tá ‘nâi hlê, tơdroăng cheăng kâ ối trâm hên xahpá. Xua mê, thăm rế ‘nâi hên tơdroăng ki xahpá, hlê mâu tơdroăng púi vâ dêi kuăn pơlê kô pro ăm Kuô̆k hô̆i ai mâu tơdroăng vâ pơkâ ‘na tŏng kum ăm mâu kơpong ki mê, rak tơniăn tung mơdêk tơdroăng rêh ối dêi kuăn pơlê kơdroh tơdroăng pá vâi’’.

Pôa Y Khut Niê, Kuăn ngo Rơđế, Ngế xiâm phŏ pơkuâ Khu Kăn Kuô̆k hô̆i kong pơlê Dak Lak hneăng 14 trâm mâ kuăn pơlê

Hneăng kố nah, Kuô̆k Hô̆i hiăng tơbleăng 2 tơdroăng pơkâ ki kal, mê cho Tơdroăng pơkâ kơxô̆ 88 tơbleăng Tơdroăng tơkêa bro tâi tâng mơnhông cheăng kâ rêh ối kơpong hdroâng kuăn ngo, kong ngo pơla hơnăm 2021-2030 ƀă Tơdroăng pơkâ kơxô̆ 120 kĭ  tiô troăng pơkâ ‘no liăn Mơjiâng pro tơmeăm khoăng tơnêi têa mơnhông cheăng kâ –rêh ối kơpong hdroâng kuăn ngo ƀă kong ngo hơnăm 2021-230.

Ki tơxâng vâ tối, tơdroăng pơkâ 88 pêi pro troh hơnăm 2030 cho kơdroh rơpŏng kơtiê chu ối pá xôp 10%. Pôi tá ăm ai mâu cheăm, mâu thôn kơtiê xahpá ó; 70% kơxô̆ cheăm hdroâng kuăn ngo châ mơnhên tối cho thôn pơlê nếo.

Pôa Nguyễn Lâm Thành, khu kăn Kuô̆k hô̆i kong pơlê Lạng Sơn tối:

“Kuô̆k Hô̆i hiăng tơbleăng tơdroăng Pơkâ, cho mâu tơdroăng pêi pro tiô pơkâ tung mâu tơdroăng pơkâ tŏng kum hdroâng kuăn ngo ƀă mâu tơdroăng pơkâ thế tơleăng mơnhên. Kô chiâng séa ngăn kô cho roh apoăng Kuô̆k hô̆i ai pơkâ ki kân. Kố cho mơhno hnoăng cheăng ƀă tơdroăng hơ-ui ƀă mâu kuăn ngo kơpong kong ngo. Kố xuân cho rôh ki pin vâ pơtối tơbâ ƀă mơhno hnoăng cheăng dêi tơná ƀă mâu kơpong kơtiê xahpá vâ kum kơpong ki mê mơnhông cheăng kâ rơtế ƀă tơnêi têa ƀă hnối tơniăn mơnhông, ôh tá pơrah pơla mâu hdroâng mơngế’’.

Xua akố tơnêi to rơnâk ngo, troăng prôk pá puât, tá tuăn ngoâ kuăn pơlê kuăn ngo akố ôh tá hlê plĕng ... tâng tơdroăng  hôp tơpui, mơhnhôk tâ phĭu ƀă tơkŭm po tâ phĭu pêi pro ôh tá tro kô tơdjâk troh tơdroăng rêh ối dêi mâu kuăn ngo xuân môi tiah tơdjâk ki tơchoâm dêi hneăng tâ phĭu.

Vâ ai kơxô̆ phĭu rah xo ki iâ gá châ 18% mâu kăn kuăn ngo pêi cheăng tung hneăng Kuô̆k hô̆i 15, vâ châ rah xo khât mâu ngế tơxâng, teăng mâ ăm hdroâng kuăn ngo kal thế ai veăng tí tăng ngăn ‘nâi plĕng nhên ƀă thế hlê nhên lý lịch dêi mâu ngế ki lo tơbriât bro kăn. Malối cho tơdroăng nếo ai, tơdroăng hnê tối kal thế châ tơmâng khât vâ mâu kuăn pơlê hlo ki ai pơxúa, ki kal, tơdroăng ki kal, mâu tơdroăng cheăng pêi ‘na tâ phĭu, kơhnâ veăng mơhnhôk kuăn pơlê veăng tâ phĭu vâ pê klêi hnoăng ki pơxúa, hnoăng cheăng dêi kuăn pơlê ki lăm tâ phĭu.

Xua mê, tâ phĭu rah xo mâu ngế teăng mâ kuăn pơlê cho rah xo mâu ngế teăng mâ ăm hdroâng kuăn ngo veăng mơjiâng luât pơkâ tŏng kum, tối ‘na luât pơkâ tŏng kum séa ngăn ƀă séa ngăn tơdroăng pêi pro ‘na luât. Kăn Kuô̆k hô̆i hneăng 14, pôa Quàng Văn Hưng, khu kăn kong pơlê Sơn La tối:

“Hnê tối thế ‘nâi hnê ti lâi vâ kuăn pơlê kuăn ngo hlê ‘na lý lịch, ‘na ki rơkê lơ ôh tung pêi cheăng, ƀă thế pêi cheăng tá tuăn tá hiâm mơno vâ, pê tiô hnoăng cheăng pơcháu dêi mâu kăn ki pin hiăng rah xo. Kal thế tơbleăng mâu tơdroăng pêi tơ-ƀrê, ki hiâm mơno lĕm ‘na pêi cheăng kơhnâ, ing mê, kuăn pơlê hlo ngế ki tơná rah xo teăng mâ ăm tơná. Tung mê, tâng rah xo mâu kuăn ngo lơ mâu ngế ki rêh ối tung kơpong hdroâng kuăn ngo veăng mot cheăng tung Kuô̆k hô̆i mê thế rah xo mâu ngế ki ai rơkong tơpui tối tiô rơkong kuăn pơlê tối, thế  tối mâu tơdroăng púi vâ dêi kuăn pơlê ăm kơ koan Kuô̆k hô̆i”.

VOV1

Gương tơplôu ƀă tơbleăng