VOV4.Sêdang - A roh pêi cheăng kơxo lơ 23/4 ƀă Pơlê kong kân Hồ Chí Minh ‘na  tơdroăng hbrâ mơdât COVID 19, pôa Vũ Đức Đam, Ngế pro xiâm phŏ hnê ngăn tơnêi têa pơkâ mâu khu cheăng kal séa ngăn tung roh leh la ngiâ, mơdât mơngế mot rêh ối ôh tá tro luât, xuân môi tiah  tơdroăng pâng rơkong môh a tíu tơdjuôm vâ mơdât ki tâ tú dêi pơreăng.

Xông tơpui a roh hôp, pôa Vũ Đức Đam tối, Pơlê kong kân Hồ Chí Minh hiăng mơdât COVID 19 tơtro ƀă hên troăng pêi ki rơkê má môi tung lâp tơnêi têa. Laga, măng tĭng kố nah, kơpong châu Á tâk 34% kơxô̆ mơngế tro tâ COVID 19, mâu kong têa tung kơpong pơrá dế tâk hên, pơlê kong kân Hồ Chí Minh cho tíu ki tơ’lêi tâ tú, kuăn pơlê troh akố hên, xua mê, kal pơtối mơdât krá tơniăn, ki má lối cho ƀă mâu ngế ki mot rêh ối.

Ngế pro xiâm phŏ hnê ngăn tơnêi têa pơkâ kal thăm séa ngăn, mơdât mâu ngế mot rêh ối ôh tá tro luât, xuân môi tiah tơdroăng pâng rơkong môh a tíu tơdjuôm vâ mơdât pơreăng tâ tú.

A Sa Ly tơplôu ƀă tơbleăng