VOV4.Xơ Đăng - Tung hâi lơ 9/11, Kuô̆k hô̆i hiăng tơpui tơno ‘na xúa liăn ngân tơnêi têa hơnăm 2021, tơdroăng hbrâ liăn ngân dêi Tơnêi têa, troăng rơhlâ xing xoăng liăn ngân xiâm tơnêi têa hơnăm 2022 ƀă pơkâ ‘na liăn ngân tơnêi têa 3 hơnăm (2022-2024); Troăng rơhlâ mơnhông mơdêk cheăng kâ - rêh ối, malối xing xoăng liăn ngân xiâm tơnêi têa hơnăm 2022 môi tiah lâi vâ xúa châ tơ-ƀrê kơxô̆ liăn dêi tơnêi têa. Kố cho tơdroăng ki châ hên mâu kăn pơtối pâ thế.

Mâu tơdroăng ki ‘nâ tối, hnoăng pêi pro mâu Tơdroăng pơkâ tơnêi têa ối hrá. Kăn teăng mâ môi tuăn tơdroăng pơtroh liăn 16 rơpâu rơtal ing hơnăm 2021 troh hơnăm 2022 vâ tâi tang liăn ngân xiâm tơnêi têa ăm pêi tơdroăng pơkâ tơnêi têa tung hơnăm 2022 kô châ 24 rơpâu rơtal liăn. Tơdroăng kố pro tơniăn a kơxô̆ liăn pêi mâu tơdroăng ki hiăng pơkâ, ai tiô púi vâ dêi kuăn pơlê malối cho a kơpong kong ngo, kơpong xơpá.

Mâu kăn hlo, xing xoăng hnoăng pơkuâ rơdêi tâ cho troăng rơhlâ ki tơ-ƀrê vâ xĭng xoăng liăn rĕng tâ, teăm tơdrêng, ing mê rĕng tơbleăng kơxô̆ liăn. Kố xuân cho tơdroăng pơkâ tung pơla mơdêk xo liăn ‘no mơjiâng tơmeăm khoăng ton hơnăm, vâ xo liăn mơjiâng tơmeăm khoăng ki djâ pêi ahdrối, mơhnhôk ‘no liăn mơjiâng tơmeăm khoăng ăm pơlê pơla.

Gương tơplôu ƀă tơbleăng