VOV4.Sêdang - Pêi pro ƀă hlối rak ngăn theh Căn cước kuăn pơlê cho troăng hơlâ dêi Chin phuh pơkâ. Pêi pro tiô hnê mơhno dêi khu xiâm Kŏng an, mâu khu râ pơkuâ cheăng kŏng an kong pơlê Dak Lak dế mơdêk pêi, tăng hên ngế, tăng chôu pêi cheăng vâ tơdah xo hồ sơ chêh inâi pro theh Căn cước ki krâ chíp điê̆n tưh ăm kuăn pơlê vâ tơniăn ƀă tro tiô pơkâ.

Tíu xiâm tŏng kum chêh pro hlá mơ-éa tơdjuôm kong pơlê Dak Lak cho 1 tung 18 to tíu ki pêi pro bruô theh căn cước kuăn pơlê krâ chip on tơhrik tung lâp kong pơlê. Ƀă 3 tôh pêi cheăng, klâ pro 3 rôh: kơxo – kơxê – kong măng, sap ing 7 chôu kơxo má troh 22 chôu kong măng, rêm hâi tơdah xo dâng 600 to hồ sơ dêi kuăn pơlê troh pro theh căn cước kuăn pơlê. Hâi chôu pêi cheăng rế tâk troh 15 chôu tung môi hâi teăng ăm 8 chôu tung môi hâi môi tiah hdrối nah hiăng pro tơ’lêi hlâu ăm kuăn pơlê troh chêh tối hbru theh.

Pôa Y Dheč Kƀuôr, kuăn pơlê a Ƀuôn Akŏ Dhông, bêng Tân Lợi, pơlê kong kơdrâm Ƀuôn Ma Thuột troh pêi cheăng a hâi dế ăm ‘nâi:

“Mâu vâi tăm pêi cheăng kơhnâ khât vâ pêi pro tơdroăng ki rơhêng vâ tiô chôu pơkâ, tơdroăng ki hbru ăm theh căn cước ăm kuăn pơlê. Ƀă hiâm mơno pôu râng tơdroăng cheăng môi tiah mê ngin xuân hlo phiu ro xua troh akố hlo rĕng châ pro. Ƀă tơdroăng pêi môi tiah kố á hlo hiâm mơno pêi cheăng tâng vâ pơchông ƀă tơdroăng cheăng gá tơƀrê khât’’.

Kŏng an Dak Lak dế kơhnâ kum kuăn pơlê pro theh căn cước

Pôa Kiều Văn Trầm, kăn phŏ ngăn  Ƀơrô cheăng Kăn sat rak ngăn hlá mơéa ‘na tơniăn tung pơlê pơla Kŏng an kong pơlê Dak Lak ăm ‘nâi, rơtế ƀă tơdroăng ki mơdêk vâ chê péa hdroh chôu pêi cheăng rêm hâi ƀă pêi tung plâ 7 hâi tung măng tĭng, kơvâ ngăn Kŏng an ối pơtroh kăn ƀô̆ ki pêi dêi hnoăng cheăng rơkê, troh a mâu cheăm kum kuăn pơlê pro hbru theh căn cước kuăn pơlê.

Laga, xua kong pơlê kân rơdâ, kuăn pơlê rêh ối tơprâ tơprŭng, mâu kế tơmeăm ki vâ pro ối iâ mê hnoăng cheăng pro hbru theh căn cước ối trâm hên xơpá. Hdrối nah, pơkâ thế hên tơdroăng, Kŏng an kong pơlê Dak Lak pơkâ mơ’no mơdêk chôu pêi cheăng tâk troh 19 chôu tung môi hâi ƀă pro mơjiâng tơ’nôm mâu tôh pêi dêi hnoăng cheăng ukố utá troh a mâu cheăm hngế hngo:

“Vâ tơ’lêi hlâu ăm vâi krâ nhŏng a kơpong hngế hngo troh pro theh căn cước kuăn pơlê, ngin hiăng tơbleăng khu ki ki pro troh a mâu cheăm, bêng ối tung mâu tơring, pơlê kong krâm, pơlê kong kơdrâm. Kuăn pơlê a mâu cheăm bêng ki lâi mê lăm troh a tíu ki nâp xo hồ sơ vâ pro ăm gá achê. Tơdrêng amê tâng ai tơdroăng ki tá hâi tro ‘ló tung mơ-éa ki tơná chêh mê kŏng an cheăm, bêng mơnhên, ‘mot tơ’nôm tơdrêng ăm vâi krâ nhŏng o châ tơ’lêi hlâu.

Má péa, nôkố tơdroăng pơkâ ngin cho athế tơkŭm pro a mâu tíu ki lâi ki ai hên kuăn pơlê mê pro ăm hdrối, a kong hâi pro a tíu ki hngế, kong măng pro a tíu ki achê. Sap ing nôkố troh lơ 30/6 tâi tâng mâu kuăn pơlê pơrá châ pro theh căn cước a cheăm, tơring tơná ối”.

Troh hâi lơ 30/6 Kŏng an Dak Lak kô pro klêi 1 rơtuh 200 to theh căn cước kuăn pơlê

Tiô riân ngăn, lâp kong pơlê Dak Lak ai dâng 1 rơtuh 500 ngế kuăn pơlê ai tŭm tơdroăng ki châ hbru ăm theh căn cước kuăn pơlê. Troh nôkố, Kŏng an kong pơlê hiăng tơdah xo 70 rơpâu to hồ sơ pơtroh ăm Khu xiâm ngăn Kŏng an hơ’leh, pro hbru theh. Tiô túa pơkâ troh hâi lơ 30/6 Kŏng an Dak Lak kô pro klêi vâ chê 1 rơtuh 200 theh căn cước kuăn pơlê (tiô pơkâ châ iâ hlái cho 70% ki Khu xiâm pơkâ).

Tiah mê, rêm hâi athế tơdah xo dâng 9.600 to hồ sơ. Ƀă hiâm mơno pôu râng tơdroăng cheăng dêi khu kŏng an, kuăn pơlê tung kong pơlê loi tơngah tơdroăng ki pro theh căn cước kuăn pơlê kô rêm hâi rế tơ’nôm ki tơ’lêi hlâu ƀă pro klêi tro tơdroăng pơkâ mơ’no.

Thươ̆ng tă Tô Anh Dũng, kăn phŏ ngăn Kăn sat Rak ngăn hlá mơéa ‘na tơniăn pơlê pơla, Khu xiâm Kŏng an ăm ‘nâi: Klêi kơ’nâi Luât Căn cước kuăn pơlê châ Kuô̆k hô̆i tơbleăng, Khu xiâm ngăn Kŏng an hiăng tơkŭm ‘mâi rơnêu, hơ’leh, tí tăng tung troăng hơlâ ki pro, hbru ƀă rak ngăn kiêm tra chiâng căn cước kuăn pơlê. Căn cước kuăn pơlê châ tơdjêp, tơbleăng, tí tăng, kum tơbrê tung hnoăng cheăng rak ngăn tơnêi têa, pơkâ thế hnoăng cheăng dêi kơvâ kŏng an.

“Hdrối nah, hbru ăm kiêm tra kuăn pơlê cho ai hnoăng cheăng ‘na hnoăng cheăng tiê hơ‘răng kăn kŏng teăng ăm xo vê hơ’răng kăn kŏng. Mê ngin hiăng hbrâ ăm tơdroăng ki hriâm ăm 63 to kong pơlê a Đăi hok Bách khoa ƀă C06 kô hbrâ ai hlá mơéa điê̆n tưh pơtroh ăm kŏng an mâu kong pơlê vâ mâu vâi pú chêh inâi kăn ƀô̆, lêng vâ ngin ai túa pơkâ hnê”.

Tơdroăng ki pro, hbru ƀă rak ngăn hlá kiêm tra kuăn pơlê chiâng căn cước kuăn pơlê cho tơdroăng pơkâ dêi Chin phuh. Khu xiâm rak liăn ngân hiăng pơkâ ‘na tơdroăng ki kơdroh liăn nâp ăm kuăn pơlê pro theh căn cước kuăn pơlê. Tiah mê, tâi tâng mâu kuăn pơlê Việt Nam sap ing 14 hơnăm tơngi klêng drêng lăm pro, lơ hơ’lêh theh căn cước kuăn pơlê, hơ’leh sap ing kidêm tra ai 9 to kơxô̆, chiâng 12 to kơxô̆ theh căn cước kuăn pơlê xuân châ kơdroh tơdế kơlo liăn nâp tâng vâ pơchông ƀă pơkâ hdrối nah. Nôkố, kơvâ Kŏng an mâu tơring, cheăm dế mơdêk tơdroăng ki pro hbru ƀă rak ngăn căn cước kuăn pơlê.

VOV Tây Nguyên

Katarina Nga tơplôu ƀă tơbleăng