VOV4.Sêdang - Kơxê lơ 8/4, Kuô̆k hô̆i hneăng má XIV hiăng mơgêi Hneăng hôp roh má 11. Xông tơpui mơgêi hneăng hôp, pôa Vương Đình Huệ, Kăn xiâm hnê ngăn Kuô̆k hô̆i tối nhên: klêi kơ’nâi 12 hâi pêi cheăng thâ, kơtăng, pôu râng hnoăng cheăng, Hneăng hôp má 11, Kuô̆k hô̆i hneăng má XIV hiăng pêi kêi đeăng tâi tâng tơdroăng pơkâ mơ’no ƀă châ tơƀrê lĕm.

Tâi tâng a leh koh hlá cơ mơgêi Hneăng hôp má 11, Kuô̆k hô̆i hneăng má XIV

Kuô̆k hô̆i hiăng mơgêi trâu hơngế, tŭm têk tơdroăng pêi cheăng hneăng hơnăm 2016 – 2021 dêi mâu kơ koan tung khu râ kăn xiâm pơkuâ tơnêi têa, séa ngăn, pơkâ tơdroăng rah xo mâu kăn pêi cheăng ƀă mâu tơdroăng xiâm ki ê.

Kuô̆k hô̆i mơdoh hên chôu tơpui tơno, mơnhên mâu tơbleăng dêi Kuô̆k hô̆i, Kăn xiâm hnê ngăn tơnêi têa, Chin phuh, mâu kơ koan dêi Kuô̆k hô̆i, Hngêi tơleăng xiâm, Kơ koan xiâm séa ngăn ‘na arak luât, Kơ koan xiâm xêo kế tơmeăm khoăng tơnêi têa.

Xuân tung kơxê lơ 8/4, Kuô̆k hô̆i hiăng kĭ pơkâ tơdroăng dêi kăn xiâm hnê ngăn tơnêi têa ‘na inâi Kăn xiâm phŏ hnê ngăn tơnêi têa ƀă mâu kăn cheăng Tung Hô̆i đong kring gâk pơlê pơla ƀă tơdroăng ki tâ phĭu pơkí, tung mê, Pôa Phạm Minh Chính, Ngế pro xiâm hnê ngăn tơnêi têa pro kăn xiâm phŏ hnê ngăn Hô̆i đong tơdroăng cheăng lêng gâk kring.

Pôa Vương Đình Huệ, kăn xiâm hnê ngăn Kuô̆k hô̆i, pôa Phan Văn Giang, kăn xiâm pơkuâ ngăn lêng, pôa Bùi Thanh Sơn, pro kăn cheăng tung Hô̆i đong dêi khu pơkuâ ngăn lêng ƀă gâk kring. Kuô̆k hô̆i xuân hiăng kĭ pơkâ tơdroăng ki tâ phĭu ƀă mâu inâi vâ pôa pôa Đỗ Văn Chiến, kăn pơkuâ ngăn Tíu xiâm Đảng, kăn pơkuâ ngăn Đảng Đoân Măt trâ̆n tơnêi têa Việt Nam ƀă jâ Võ Thị Ánh Xuân, kăn cheăng tung tíu xiâm Đảng, kăn xiâm phŏ hnê ngăn tơnêi têa ƀă hnoăng cheăng cho kăn xiâm phŏ hnê ngăn Hô̆i đong tâ phĭu tơnêi têa, rơtế ƀă hên tíu cheăng kăn Hô̆i đong tâ phĭu tơnêi têa.

Klêi mê, Kuô̆k hô̆i tơbleăng tơdroăng pơkâ ‘na kĭ pơkâ mâu ngế cheăng ki nếo ăm mâu kăn xiâm phŏ hnê ngăn tơnêi têa ƀă mâu kăn cheăng tung Hô̆i đong tâ phĭu tơnêi têa.