VOV4.Sêdang - Kơ’nâi 3 hâi pêi pro hên tơdroăng trâm mâ mơhno túa lĕm tro, mê kơmăng lơ 11/4, a pơlê kong kơdrâm Hội An “Mâu hâi mơhno túa lĕm tro Hàn Quốc a Quảng Nam, Hô̆i An hơnăm 2021” xua Vi ƀan kong pơlê Quảng Nam, Kăn teăng mâ Hàn Quốc, Tíu xiâm ngăn ‘na mơhno túa lĕm tro Hàn Quốc a Việt Nam tơrŭm ƀă tơkŭm po mơgêi hneăng hôp.

Ƀă hên tơdroăng cheăng tí tăng ‘nâi ‘na mơhno ki lĕm tro, ôm hyô, pơchên hmê kơchâi kâ dêi Hàn Quốc, tơdroăng kố hiăng pro chôu pâ tung tuăn mơno kuăn pơlê kơphô̆ Hội An ƀă mơngế ki troh ôm hyô. Mâu tơdroăng xah hêi hơdruê xuâng, mơhno túa lĕm tro hiăng pro thăm tơrŭm ƀă mơnhông krá tâ pơla Quảng Nam ƀă mâu kong pơlê ki tơrŭm ƀă Hàn Quốc.

Mơgêi hâi leh mơhno túa lĕm tro Hàn Quốc tơkŭm po a kong pơlê Quảng Nam

Tơdroăng po mê cho rôh vâ tơbleăng, pơtối pêi pro tơdroăng thăm tơrŭm mơdêk ôm hyô pơla péa tơnêi têa klêi kơ’nâi hiăng tâi pơreăng COVID-19. La ngiâ kố ah, tâng kâi mơdât pơreăng COVID-19, kong pơlê Quảng Nam kô tơrŭm ƀă mâu khu ngăn djâ mơngế lăm ôm hyô pâ phep mâu kơ koan xiâm tơnêi têa ăm tơ-ƀai kơneăng chơ mâu tơmối Hàn Quốc troh ôm hyô a Quảng Nam.

Gương tơplôu ƀă tơbleăng