VOV4.Sêdang - Troăng hơhlâ pêi pro dêi Tơdroăng pơkâ tơnêi têa ‘na mơnhông cheăng kâ- reh ối kơpong hdroâng kuăn ngo ƀă kong ngo pơla hơnăm 2021- 2030 kuăn pơlê kô châ xúa ing tơdroăng dêi tơnêi têa, pakĭng mê, pơtối rak vế tơmeăm khoăng ki ai hlâu, dêi kơpong,  mơnhôk ai tuăn mơ-eăm dêi mâu hdroâng kuăn ngo vâ kơpong kong ngo châ mơnhông tơ-ƀrê. Vâ ai tiah pơkâ mê, Tơdroăng mơhnhôk tăng liăn, tơ’mot khu ‘no liăn cheăng pêi pro Tơdroăng dêi Kuô̆k hô̆i, Chin phuh tơmâng khât.

Pơkâ dêi Kuô̆k hô̆i kĭ Tơdroăng pơkâ xiâm Tơnêi têa ‘na mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030 mơnhên mơhno cho: mơ’no tâi tâng tơmeăm khoăng, mơngế pêi cheăng, liăn ngân vâ mơnhông cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo, tung mê, tơmeăm khoăng, liăn ngân, khu râ cheăng tơnêi têa cho kal má môi vâ mơhnhôk mâu khu râ ki ê. Kố cho môi tơdroăng ki nếo, kal khât xua troăng hơlâ thế ai kơxô̆ liăn tơniăn. Ki ê nếo, mâu pơlê, cheăm kơpong hdroâng kuăn ngo ƀă kong ngo pơrá cho kong pơlê ki pá puât lơ pá puât păng ‘nâng. Xua mê, tơmeăm khoăng, liăn ngân tơ’nôm dêi Tơnêi têa cho môi tơdroăng ki apoăng pơkâ vâ châ plah tiô pơkâ.

Laga, tung pơla kơxô̆ liăn ki xiâm dêi tơnêi têa ối trâm pá xua pơreăng COVID-19, kal mơhnhôk tơ’nôm kơxô̆ liăn pơlê pơla vâ Tơdroăng pơkâ pêi Tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030 pêi pro châ tơƀrê. A hneăng hôp má môi Kuô̆k hô̆i hneăng má 15 nếo achê kố, jâ Bố Thị Xuân Linh, kăn teăng mâ Kuô̆k hô̆i kong pơlê Bình Thuận pơkâ thế:

‘’Vâ tơniăn chiâng pêi pro ƀă châ tơƀrê dêi tơdroăng, Chin phuh ai troăng pêi i nhên tơniăn tung mơ’no kơxô̆ liăn teăm tơdrêng ƀă tơdâng tơ’mô tiô troăng ai hên tíu xo kơxô̆ liăn mơ’no cheăng. Tung mê, kơxô̆ liăn tơnêi têa cho kal ƀă ai pơkâ tro tơdroăng. Thăm mơhnhôk mâu kơxô̆ liăn ki pa kong tơnêi têa. Mơhnhôk tơdroăng ki veăng tơlo kum dêi kuăn pơlê vâ pêi pro pơkâ xiâm dêi tơdroăng pơkâ pêi tiô troăng tơnêi têa ƀă kuăn pơlê rơtế pêi. Tơdrêng amê, tung tơdroăng pêi pro thế tơmâng hnê mơhno nhên tơdroăng kum mơ’no tơdrêng mâu kơxô̆ liăn vâ pêi pro mâu tơdroăng pơkâ pêi dêi tơnêi têa tung mơdêk cheăng kâ – rêh ối pơlê pơla kơpong vâi krâ hdroâng kuăn ngo châ tơƀrê’’.

Tơdroăng thăm mơhnhôk kơxô̆ liăn lâp plâi tơnêi ăm Tơdroăng pơkâ pêi tơnêi têa mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo hneăng hơnăm 2021 – 2030 xuân châ tơmâng tŏng kum. Hngêi arak liăn lâp plâi tơnêi a Việt Nam hiăng tơbleăng ki tơtro ‘na tơdroăng Khu pơkuâ kơxô̆ liăn Tơrŭm cheăng Hnê hriâm lâp plâi tơnêi, dó inâi (GPE) ăm Chin phuh Việt Nam kơxô̆ liăn tŏng kum ôh tá tơvêh 25 rơtuh dollars ƀă pơcháu hnoăng ăm Hngêi arak liăn lâp plâi tơnêi cho Tíu dêi kơxô̆ liăn tŏng kum ăm Việt Nam. Vi ƀan hdroâng mơngế mơjiâng pơkâ tơrŭm ƀă Khu xiâm pơkâ pêi Mơ’no liăn cheăng, Khu xiâm pơkuâ liăn ngân vâ tơbleăng ăm Chin phuh xúa 25 rơtuh dollars tŏng ôh tá xo tơvêh dêi GPE, vâ tơ’nôm kơjo ăm kơxô̆ liăn mung vâ pơkâ cho 150 rơtuh dollars ing Hngêi arak liăn lâp plâi tơnêi tơ’nôm ăm pêi pro Tơdroăng pơkâ pêi Tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030.

Pakĭng mê, Ngế pro xiâm hnê ngăn Chin phuh nếo kĭ Tơdroăng tơkêa bro pro mơdon hâi khế pêi pro Pơkâ kơxô̆ 2214 ‘na tơdroăng kĭ tơdroăng tơkêa bro ‘’Thăm tơrŭm lâp plâi tơnêi tŏng kum mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo’’ troh hơnăm 2025, ƀă pơkâ pêi tơdjuôm vâ pơtối thăm tơrŭm cheăng mơhnhôk kơxô̆ liăn mơ’no liăn cheăng, khoa hok kih thuât, túa pêi ki rơkê tơtro dêi mâu kong têa, mâu khu tơrŭm lâp plâi tơnêi, khu pú hên, ngế krê a kong têa ê, tŏng kum mơ’no liăn cheăng mơnhông mơdêk cheăng kâ – rêh ối pơlê pơla ăm kơpong vâi krâ hdroâng kuăn ngo ƀă kong ngo. Mâu kơvâ kơjo dêi Tơdroăng tơkêa bro ƀă tơdroăng xiâm Tơdroăng pơkâ pêi tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030.

Ki nhên, mơnhên, tŏng kum tơdroăng ôh tá hâi tŭm ‘na tơnêi ối, hngêi ối, tơnêi pêi kâ, têa ôu, hum, rôh jíu dêi rơpŏng hdroâng kuăn ngo; mơnhông pêi chiâk deăng, gak ngăn mơnhông pêt kong, tơmeăm ki ai hên dêi mâu kơpong vâ mơjiâng pro kế tơmeăm tiô troăng ki tơtro. Mơ’no liăn mơjiâng pro hngêi trăng, troăng klông, kum tung pêi kâ, tơdroăng rêh ối tung kơpong vâi krâ hdroâng kuăn ngo ƀă mâu tíu pêi cheăng dêi kơ koan tơnêi têa dêi kơvâ hdroâng mơngế; mơ’no liăn mơnhông mơdêk hnê hriâm – hnê mơjiâng tuăn ngôa rơkê kơpong hdroâng kuăn ngo ƀă kong ngo mơdêk rơkê hôm mâu ngế pêi cheăng cho mơngế hdroâng kuăn ngo; mơ’no liăn hriăn plĕng khoa hok ƀă hnê kŏng ngê̆ tung mâu túa tơrŭm pêi kâ tiô troăng ki kơnâ. Rak vế, mơnhông ki kơnâ khôi túa lĕm tro vâi krâ nah dêi mâu hdroâng kuăn ngo ƀă hlối mơnhông mơdêk ôm hyô; rak ngăn ivá châ chăn kuăn pơlê, mơdêk ivá châ chăn, châ ‘nhông mơngế hdroâng kuăn ngo; hbrâ mơdât hrế krĭn a vâi hdrêng; pêi pro tơdâng tơ’mô pơla kơdrâi ƀă kơnốu ƀă tơleăng mâu tơdroăng ki kal ƀă vâi kơdrâi, vâi hdrêng ƀă hía hé.

Tơdroăng tơkêa bro mơ-eăm troh hơnăm 2025, mơhnhôk tâi tâng mâu tơmeăm khoăng, liăn ngân, mơngế pêi cheăng lâp plâi tơnêi, ki rơhêng vâ tối cho kơxô̆ liăn tŏng kum ôh tá xo tơvêh, kơxô̆ liăn tŏng kum mơnhông mơdêk ƀă kơxô̆ liăn mung ki kơjo. Mơhnhôk khu râ, mơhnhôk mơ’no liăn cheăng lâp plâi tơnêi tŏng kum mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo tiô tơdroăng kal vâ ƀă tơdroăng nôkố, tơdroăng ki chiâng pêi pro ƀă tơmeăm ki ai hlâu dêi rêm kong pơlê, rêm hdroâng mơngế, tiô pơkâ rak vế ƀă mơnhông ki kơnía, khôi túa lĕm tro dêi mâu hdroâng mơngế, rak vế hyôh kong prâi. Mơhnhôk tŏng kum kih thuât ing mâu khu pú hên, mâu ngế krê lâp plâi tơnêi tung tŏng kum mơdêk ivá pêi cheăng ăm mơngế kơpong hdroâng kuăn ngo ƀă kong ngo; mơngế pơkuâ cheăng, mơngế cheăng a mâu kơ koan, tíu pêi cheăng pêi pro tơdroăng kum mâu hdroâng kuăn ngo rêm râ, ing râ tơnêi têa troh kong pơlê, tơring, cheăm ƀă pơlê.

VOV4 chêh

A Sa Ly tơplôu ƀă tơbleăng