A Ƀuôn Hai, tơdroăng ki hơ’muăn tối ‘na chôu ‘măn rak vế túa lĕm tro kuăn ngo ki pơxiâm cho ing rơpŏng hngêi. Tâng vâ tối tiah rơpŏng pôa Y Yak Ƀyă, inâi ki hmâ krếo cho Pôa Khuê. Dế nôkố, rơpŏng pôa xuân ối rak vế môi kơtum chêng ƀă ai lối chât to vó tŭm túa. Rêm hơnăm, rơpŏng pôa hmâ djâ troăng, pêi pro mâu túa rơkâu xối xeăng, trối rơkâu xối kơno têa, rơkâu hâk rêh ối ro ƀă veăng pêi pro mâu tơdroăng cheăng pơlê pơla, ‘na toăng chêng dêi pơlê cheăm. Pôa Khuê tối ăm ngin ‘nâi:

“Dế nôkố, ngin xuân ối pơtối ƀă hnê tơbâ mâu tơdroăng, tơmeăm ki kơnía git túa lĕm tro tiô khôi hmâ, trối tôu chêng ƀă mâu tơdroăng rơkâu xối ăm kuăn cháu tung rơpŏng hngêi. Rơpŏng á đi đo djâ troăng ahdrối túa rak vế, pêi pro hnoăng cheăng ki kố. Mâu tơdroăng rơkâu xối dêi hdrông Rơđế ga ai gok gâ, hên hĕng, rơkâu xối a hngêi trá xŏn lơ a chiâk deăng, rơkâu xối kơ xeăng ngo, xeăng têa kroăng ƀă hên khu xeăng ki ê. Mâu khôi túa, vêa vong ki lĕm tro xuân ối châ chôu ‘măn, rak vế ƀă pêi pro đi đo”.

Ing tuăn tơmiât ki hloh klê dêi rêm rơpŏng hngêi a ƀuôn Hai ki túa lĕm tro tiô khôi hmâ dêi hdrông Rơđế hiăng châ pơtối rak vế, pêi pro. Tung pơla mê, hên pơlê cheăm xuân ối trâm hên xahpá tung tơdroăng ki rak vế, pêi pro mâu hnoăng cheăng túa lĕm tro tiô khôi hmâ, mê a Ƀuôn Hai, mâu túa rơkâu xối kơno têa, rơkâu hâk vâi krâ rêh ton, hơnăm hiăng hên, tơdroăng toăng chêng koăng xuân u ối rak vế đi đo. Tơdrêng amê, mâu tơdroăng cheăng ‘na túa lĕm tro dêi kuăn pơlê đi đo châ ai tơdroăng rơtế veăng hnê tối, tơveăng gum ing mâu troăng tơdjâ ki gum dêi tơnêi têa. Mâu đảng viên, krâ pơlê, mơngế ki châ loi tơngah đi đo hmâ trâm, mơhnhôk thế kuăn pơlê veăng pêi pro mâu tơdroăng cheăng lĕm tro dêi pơlê pơla, tơdrêng amê, hnối hnê tối ăm khu rơxông nếo mâu túa lĕm tro tung khôi túa, vêa vong dêi hdrông kuăn ngo Rơđế. Pôa Y Bơ̆i Ƀyă, Kăn pơkuâ hnê ngăn Chi ƀô̆ ƀuôn Hai, cheăm Čư̆ Mta, kong pơlê Dak Lak tối ăm ngin ‘nâi:

“Á rơtế ƀă mâu vâi krâ pơlê, mơngế ki châ kuăn pơlê loi tơngah đi đo lăm troh, pôu ngăn, mơhnhôk mâu vâi o, vâi muăn, tơdrêng amê, pin kô châ rak vế mâu tơdroăng ki kơnía git dêi túa lĕm tro hdrông kuăn ngo tung rêh kâ ối. Tâi tâng mâu tơmeăm hdroăng pơrá châ xúa vâ rơkâu xối, pleăng ăm xeăng, rơkâu xối a kơno têa, rơkâu pâ ai kong mêi ƀă rơkâu xối ăm ivá mo lĕm, têi ‘răng, tâi tâng mâu tơdroăng mê pơrá châ pơtối rak vế trối chal vâi krâ roh nah”.

Pôa Y Bơ̆i Ƀyă tối thăm ăm ngin ‘nâi, kơnôm ai troăng tơdjâ dêi tơnêi têa ƀă tơdroăng ki tơveăng tơdjuôm ivá cheăng, mê tơdroăng rêh kâ ối dêi 132 rơpŏng kuăn pơlê ƀă lối 520 pơ’leăng mâ mơngế a Ƀuôn Hai rế hiá rế pơhlêh nếo. Tơdroăng cheăng kâ thăm rế mơnhông, mê vâi krâ-nhŏng o thăm rế hlê plĕng hên tâ ‘na tơdroăng rak vế, pơtối mơdêk khôi túa, vêa vong dêi hdrông kuăn ngo.

“Dế nôkố, Khu ngăn ‘na Túa lĕm tro hiăng diâp ăm Ƀuôn Hai môi kơtum chêng ƀă mâu hmân ếo pơtâk tiô khôi hmâ vâi krâ hdrông Rơdế. Tung hiâm tuăn kuăn pơlê đi đo trâm hên tơdroăng ki hơniâp ro, tơdrêng amê, mâu vâi rơxông nếo xuân châ pơtối mơdêk hnoăng cheăng ki vâ rơkâu xối ƀă tôu chêng trối môi khôi túa, vêa vong dêi pơlê cheăm. Kơnôm ing mâu túa ki rơkâu xối a kơno têa, vâi krâ-nhŏng o tung pơlê đi đo rak vế ƀă pro lân rơdâ rơdih ăm tơdroăng rêh kâ ối tung rêh kâ ối chal nếo”.

Rak vế khôi túa lĕm tro tiô chal krâ cho rak vế xiâm rêi ƀă hnê mơhno mâu tơdroăng ki kơnía git ăm khu rơxông kơ’nâi ah nếo. Ƀă tơdroăng ki tơveăng gum dêi khu râ Đảng, khu kăn hnê ngăn ƀă kuăn pơlê, khôi túa lĕm tro dêi hdrông Rơđế a Ƀuôn Hai kô pơtối châ ‘măn chôu, rak vế, ƀă xuân cho kơxái ki tơdjêp pơlê pơla, veăng gum mơjiâng tơdroăng rêh kâ ối túa lĕm tro rế hía rế gok gâ, ƀă mơjiâng ăm troăng hơlâ ăm hnoăng ki mơnhông krá kâk dêi pơlê cheăm.